കൊച്ചി: സൂപ്പര്‍ ലീഗ് കേരളയില്‍ ഫോഴ്സ കൊച്ചി എഫ്‌സിക്ക് തുടര്‍ച്ചയായ ആറാം തോല്‍വി. ടീമിന്റെ ഹോംഗ്രൗണ്ട് എറണാകുളം മഹാരാജസ് കോളേജ് സ്റ്റേഡിയത്തില്‍ നടന്ന മത്സരത്തില്‍ കാലിക്കറ്റ് എഫ്‌സി 6-2നാണ് ജയിച്ചത്.
കാലിക്കറ്റ് എഫ്‌സിക്കായി യുവതാരം മുഹമ്മദ് അജ്‌സല്‍ ഹാട്രിക്ക് നേടി. വിജയികള്‍ക്കായി ക്യാപ്റ്റന്‍ പ്രശാന്ത് രണ്ടും സിമിന്‍ലെന്‍ ഡെങ്കല്‍ ഒരു ഗോളുമടിച്ചു. കൊച്ചിയുടെ രണ്ട് ഗോളുകളും ഡച്ചുകാരന്‍ റൊണാള്‍ഡ് വാന്‍ കെസലിന്റെ വകയായിരുന്നു. ആറ് കളികളില്‍ 11 പോയന്റുമായി കാലിക്കറ്റ് ഒന്നാംസ്ഥാനത്തേക്ക് കയറി. ആറ് കളിയും തോറ്റ കൊച്ചി പോയന്റ് ഒന്നുമില്ലാതെ അവസാന സ്ഥാനത്ത് തുടരുകയാണ്.
കളിതുടങ്ങി അഞ്ച് മിനിറ്റിനിടെ ഏതാനും അവസരങ്ങള്‍ കാലിക്കറ്റ് എഫ്‌സി സൃഷ്ടിച്ചെങ്കിലും ഗോള്‍ കണ്ടെത്താനായില്ല. 19-ാം മിനിറ്റില്‍ ആദ്യ ഗോള്‍ നേടി.ഇടതു വിങില്‍ നിന്ന് ക്യാപ്റ്റന്‍ പ്രശാന്ത് നല്‍കിയ പന്ത് പ്രയാസകരമായ ആങ്കിളില്‍ നിന്ന് ഫസ്റ്റ്‌ടൈം ടച്ചിലൂടെ പോസ്റ്റിലെത്തിച്ചത് അണ്ടര്‍ 23 താരം മുഹമ്മദ് അജ്‌സല്‍. 34-ാം മിനിറ്റില്‍ കാലിക്കറ്റ് ലീഡ് ഇരട്ടിയാക്കി.
മധ്യനിരയില്‍ നിന്ന് ആസിഫ് നീക്കി നല്‍കിയ പാസ് മുഹമ്മദ് അജ്‌സല്‍ പോസ്റ്റിലേക്ക് തിരിച്ചുവിട്ടു (20). ആറ് മിനിറ്റിനകം കാലിക്കറ്റ് വീണ്ടും ഗോളടിച്ചു. മുഹമ്മദ് റിയാസിന്റെ ക്രോസ്സ്, പ്രശാന്തിന്റെ ഫിനിഷ് (30). ആദ്യപകുതി അവസാനിക്കാനിരിക്കെ മുഹമ്മദ് അജ്‌സല്‍ ഹാട്രിക്കും കാലിക്കറ്റ് നാലാം ഗോളും നേടി (40).
ലീഗില്‍ അഞ്ച് ഗോളുമായി അജ്‌സല്‍ ടോപ് സ്‌കോറര്‍ സ്ഥാനത്തേക്ക് ഉയര്‍ന്നു. നാല് ഗോളുകളുള്ള മലപ്പുറം എഫ്‌സിയുടെ ജോണ്‍ കെന്നഡിയാണ് രണ്ടാമത്.
വേഗതയേറിയ നീക്കങ്ങളുമായി കൊച്ചിക്കുവേണ്ടി ഉഗാണ്ടക്കാരന്‍ അമോസ് കാലിക്കറ്റ് പോസ്റ്റില്‍ നിരന്തരം ഭീഷണിയുയര്‍ത്തി. 69-ാം മിനിറ്റില്‍ കൊച്ചിയുടെ ഗോള്‍. അമോസിന്റെ ക്രോസ്സ് ഗോളിലേക്ക് തൊടുത്തത് റൊണാള്‍ഡ് വാന്‍ കെസല്‍ (41). എണ്‍പത്തിനാലാം മിനിറ്റില്‍ ആസിഫിന്റെ പാസില്‍ സിമിന്‍ലെന്‍ ഡെങ്കല്‍ കാലിക്കറ്റിന്റെ അഞ്ചാം ഗോളടിച്ചു. കളി അവസാനിക്കാന്‍ രണ്ട് മിനിറ്റ് ശേഷിക്കേ പ്രശാന്ത് തന്റെ രണ്ടാം ഗോളുമടിച്ചതോടെ സ്‌കോര്‍ 6-1. ഇഞ്ചുറി സമയത്ത് റൊണാള്‍ഡ് വാന്‍ കെസല്‍ ഒരു ഗോള്‍ കൂടി നേടി കൊച്ചിയുടെ പരാജയഭാരം അല്‍പ്പം കുറച്ചു (6-2).
