തിരുവനന്തപുരം: മുന്‍ ചീഫ് സെക്രട്ടറി കെ ജയകുമാര്‍ തിരുവിതാംകൂര്‍ ദേവസ്വം ബോര്‍ഡിന്റെ പുതിയ പ്രസിഡന്റ് ആകും എന്ന് സൂചന. സിപിഎം സെക്രട്ടേറിയറ്റില്‍ ജയകുമാറിന്റെ പേര് മുഖ്യമന്ത്രി നിര്‍ദ്ദേശിച്ചെന്നാണ് സൂചന.നിലവില്‍ ഐഎംജി ഡയറക്ടറാണ് കെ ജയകുമാര്‍.
ശനിയാഴ്ച ഉത്തരവിറങ്ങും എന്നാണ് അറിയുന്നത്. നിലവിലെ പ്രസിഡന്റ് പി എസ് പ്രശാന്തിന് കാലാവധി നീട്ടി നല്‍കാന്‍ നീക്കമുണ്ടായിരുന്നെങ്കിലും ശബരിമല സ്വര്‍ണക്കൊളള വിഷയത്തില്‍ സംശയ നിഴലില്‍ ആയത് തടസമായി. നിലവിലെ സാഹചര്യത്തില്‍ രാഷ്‌ട്രീയക്കാരെ നിയമിക്കുന്നത് ബുദ്ധിയല്ലെന്നാണ് മുഖ്യമന്ത്രി കരുതുന്നത്. സംസ്ഥാന സെക്രട്ടേറിയറ്റില്‍ മറ്റ് ചില പേരുകളും ഉയര്‍ന്നിരുന്നെങ്കിലും
സ്വര്‍ണക്കൊള്ള വിവാദക്കാലത്ത് ദേവസ്വം ബോര്‍ഡിനെ നയിക്കാന്‍ പരിചയ സമ്പന്നനായ ഒരാള്‍ വേണമെന്നത് മുന്‍നിര്‍ത്തിയുള്ള അന്വേഷണം കെ ജയകുമാറിലാണ് എത്തിനിന്നത്.
ശബരിമലയിലെ സ്പെഷ്യല്‍ കമ്മീഷണര്‍ അടക്കമുള്ള സുപ്രധാന പദവികളും ജയകുമാര്‍ വഹിച്ചിട്ടുണ്ട്. ചീഫ് സെക്രട്ടറി സ്ഥാനം വഹിച്ചിരുന്നതിന് പുറമെ ടൂറിസം സെക്രട്ടറി, തുഞ്ചത്തെഴുത്തച്ഛന്‍ മലയാള സര്‍വകലാശാല വൈസ് ചാന്‍സലര്‍, കേരള സ്റ്റേറ്റ് ഫിലിം ഡവലപ്മെന്റ് കോര്‍പറേഷന്‍ എംഡി, എം ജി യൂണിവേഴ്സിറ്റി രജിസ്ട്രാര്‍ തുടങ്ങി നിരവധി പദവികള്‍ കെ ജയകുമാര്‍ വഹിച്ചിട്ടുണ്ട്. എഴുത്തുകാരനും ചലച്ചിത്ര ഗാനരചയിതാവുമാണ് അദ്ദേഹം.
