ഗോവ: ഗോവയില് നടക്കുന്ന ഫിഡെ ചെസ് ലോകകപ്പ് 2025ല് ഇന്ത്യയുടെ പ്രജ്ഞാനന്ദ, വിദിത് ഗുജറാത്തി, പ്രണവ് എന്നിവര് വ്യാഴാഴ്ച മൂന്നാം റൗണ്ടിലേക്ക് കടന്നു. അതേ സമയം, ഇന്ത്യയുടെ നിഹാല് സരിന്, റൗണക് എന്നിവര് പുറത്തായി. നോക്കൗട്ട് രീതിയായതിനാല് തോറ്റവര് പുറത്താകുന്ന രീതിയാണ് ഇവിടെ. കാരണം 206 പേരാണ് ഈ ടൂര്ണ്ണമെന്റില് മാറ്റുരയ്ക്കുന്നത്.
ആകെ പത്ത് താരങ്ങളാണ് ഇതോടെ മൂന്നാം റൗണ്ടിലേക്ക് കടന്നത്. പ്രജ്ഞാനന്ദ, ഗുകേഷ്, അര്ജുന് എരിഗെയ്സി, പെന്റല ഹരികൃഷ്ണ, പ്രണവ്, എസ്എല് നാരായണന്, , ദീപ്തയാന് ഘോഷ്, കാര്ത്തികേയന് വെങ്കിട്ടരമണന്, പ്രണവ് വി, പ്രാണേഷ് എം എന്നിവരാണ് മൂന്നാം റൗണ്ടിലേക്ക് കടന്ന പത്ത് ഇന്ത്യന് താരങ്ങള്. തോറ്റു പുറത്തായ ഇന്ത്യന് താരങ്ങളില് നിഹാല് സരിന്, റൗണക് സാധ്വാനി, അരവിന്ദ് ചിതംബരം എന്നിവര് ഉള്പ്പെടുന്നു.
ഓരോ റൗണ്ടിലും കളിക്കാര് രണ്ട് ക്ലാസിക്കല് ഗെയിമുകളാണ് കളിക്കുക. ഇതില് സമനിലയായാല് ട്രൈബ്രേക്കറായി റാപ്പിഡ് മത്സരം നടക്കും. ആസ്ത്രേല്യയുടെ തെമൂര് കുയ്ബൊക്കറാവുമായാണ് പ്രജ്ഞാനന്ദയുടെ രണ്ടാം റൗണ്ട് മത്സരം നടന്നത്. ആദ്യം നടന്ന രണ്ട് ക്ലാസിക് ഗെയിമുകള് സമനിലയിലായതിനെ തുടര്ന്ന് മത്സരം ടൈബ്രേക്കറിലേക്ക് കടന്നു. 5 പ്ലസ് 3 ബ്ലിറ്റ്സില് പ്രജ്ഞാനന്ദ തെമൂറിനെ തോല്പിക്കുകയായിരുന്നു. റേറ്റിംഗില് പ്രജ്ഞാനന്ദയേക്കാള് 200 പോയിന്റ് കുറവാണെങ്കിലും തെമൂര് പ്രജ്ഞാനന്ദയോട് ഇഞ്ചോടിഞ്ച് പൊരുതിയാണ് തോറ്റത്.
ചെസ്സിലെ മെസ്സിയായ 12കാരന് വിദിത് ഗുജറാത്തിയോട് പൊരുതിത്തോറ്റു
ചെസ്സിലെ മെസ്സിയെന്ന് അറിയപ്പെടുന്ന 12കാരന് ഫോസ്റ്റിനോ ഓറോ ഇന്ത്യയുടെ വിദിത് ഗുജറാത്തിയോട് പൊരുതിത്തോല്ക്കുകയായിരുന്നു. ക്ലാസിക് ഗെയിമുകളില് ഓരോന്ന് വീതം ജയിച്ച് സമനിലയായതോടെ വിജയിയെ തീരുമാനിക്കാന് ബ്ലിറ്റ്സ് ടൈബ്രേക്കര് വേണ്ടിവന്നു. അതിലും അവസാനനിമിഷം വരെ വിദിത് ഗുജറാത്തിയെ വിറപ്പിച്ച ശേഷമാണ് ഫോസ്റ്റിനോ ഓറോ കീഴടങ്ങിയത്.
പക്ഷെ ഇന്ത്യക്കാരില് രണ്ടാം റൗണ്ടില് തോറ്റ് പുറത്തായ മുന്നിരതാരങ്ങളില് ഒരാള് നിഹാല് സരിന് ആണ്. ഗ്രീക്ക് ഗ്രാന്ഡ് മാസ്റ്ററായ കുര്കുലോസ് ആര്ഡിറ്റിസ് സ്റ്റമാറ്റിസ് ആണ് നിഹാല് സരിനെ തോല്പിച്ചത്. 2700 റേറ്റിംഗ് ഉള്ള നിഹാല് തന്നേക്കാള് റേറ്റിംഗ് കുറവായ താരത്തോട് തോറ്റ് പുറത്താവുകയായിരുന്നു. രണ്ട് ക്ലാസിക് ഗെയിമുകളില് സമനില പിടിച്ചതോടെ ഇരുവരും ടൈബ്രേക്കറിലൂടെയാണ് പുറത്തായത്.
അരവിന്ദ് ചിതംബരത്തിന്റെ തോല്വിയായിരുന്നു മറ്റൊരു ഷോക്ക്. ഇന്ത്യക്കാരനായ, റാങ്കിംഗ് കുറവായ കെ. വെങ്കട്ടരമണനാണ് അരവിന്ദ് ചിതംബരത്തിന്റെ അന്തകനായത്.
