ന്യൂഡല്ഹി : ലോകകപ്പ് ജേതാക്കളായ ഇന്ത്യന് വനിതാ ക്രിക്കറ്റ് ടീമിന് കഴിഞ്ഞ ദിവസം പ്രധാനമന്ത്രി നരേന്ദ്രമോദി സ്വീകരണമൊരുക്കിയിരുന്നു . ബുധനാഴ്ച പ്രധാനമന്ത്രിയുടെ ന്യൂഡല്ഹിയിലെ ഔദ്യോഗിക വസതിയിലായിരുന്നു സ്വീകരണം. ‘നമോ 1’ എന്ന് പേരെഴുതിയ ടീം ജേഴ്സി ഇന്ത്യന് താരങ്ങള് പ്രധാനമന്ത്രിക്ക് സമ്മാനിച്ചു. ടീം അംഗങ്ങളെല്ലാം ഒപ്പിട്ട ജേഴ്സിയാണ് താരങ്ങള് മോദിക്ക് നല്കിയത്.
പ്രധാനമന്ത്രിയുമായുള്ള ഈ കൂടിക്കാഴ്ചയ്ക്കായി താന് ആകാംക്ഷയോടെ കാത്തിരുന്നതായി ടൂര്ണമെന്റിലെ താരമായി തിരഞ്ഞെടുക്കപ്പെട്ട ദീപ്തി ശര്മ പറഞ്ഞു. പ്രധാനമന്ത്രി മോദിയുടെ പ്രസംഗങ്ങള് കേട്ടതില് നിന്ന് തനിക്ക് വളരെയധികം പ്രചോദനം ലഭിച്ചിട്ടുണ്ടെന്നും ദീപ്തി കൂട്ടിച്ചേര്ത്തു.
സംഭാഷണത്തിനിടെ, ദീപ്തിയുടെ ഇന്സ്റ്റാഗ്രാമിലെ ‘ജയ് ശ്രീ റാം’ പോസ്റ്റും കൈയിലെ ഹനുമാന് ടാറ്റുവും ശ്രദ്ധിച്ചതായി മോദി പറഞ്ഞു. ഹനുമാന് ടാറ്റു എങ്ങനെയാണ് സഹായിച്ചതെന്ന് ചോദിച്ചപ്പോള് തനിക്ക് തന്നേക്കാള് വിശ്വാസം അദ്ദേഹത്തിലാണെന്നായിരുന്നു ദീപ്തിയുടെ മറുപടി. കളി മെച്ചപ്പെടുത്തുന്നതില് വ്യക്തിപരമായി അത് തന്നെ വളരെയധികം സഹായിച്ചിട്ടുണ്ടെന്നും ദീപ്തി പറഞ്ഞു. ലോകകപ്പ് വിജയത്തിനു ശേഷം ദീപ്തി ഇന്സ്റ്റാഗ്രാമില് പങ്കുവെച്ച ചിത്രങ്ങള്ക്കെല്ലാം താരം ‘ജയ് ശ്രീ റാം’ എന്ന ഹാഷ്ടാഗ് നല്കിയിരുന്നു. ഇതാണ് കൂടിക്കാഴ്ചയില് മോദി ചൂണ്ടിക്കാട്ടിയത്.
