ചെന്നൈ: സര്‍ക്കാര്‍ സൗജന്യങ്ങള്‍ നല്‍കുന്നത് ജനങ്ങള്‍ നോക്കിയിരിക്കുന്നത് നല്ല സംസ്കാരമല്ലെന്ന് നടന്‍ അജിത്. തെരഞ്ഞെടുപ്പ് അടുത്തുവരുന്നതോടെ ജനങ്ങള്‍ക്ക് സൗജന്യങ്ങള്‍ അനുവദിക്കുന്ന ഡിഎംകെ സര്‍ക്കാരിനും സ്റ്റാലിനും എതിരായ പരോക്ഷ വിമര്‍ശനമാണ് അജിത് നടത്തിയത്.
ജനങ്ങള്‍ ഇങ്ങിനെ സൗജന്യങ്ങള്‍ ഉറ്റുനോക്കുന്നതും സര്‍ക്കാരുകള്‍ അങ്ങിനെ സ്ഥിരമായി ചെയ്യുക എന്നത് ശരിയായ ഏര്‍പ്പാടല്ലെന്നും അജിത് പറയുന്നു. “ഇങ്ങിനെ ജനങ്ങള്‍ക്ക് വാരിക്കോരി സൗജന്യങ്ങള്‍ നല്‍കാന്‍ സര്‍ക്കാരിന്റെ കയ്യില്‍ എവിടെനിന്നാണ് പണം? രാജ്യം ഭരിക്കുക എന്നതാണ് സര്‍ക്കാരിന്റെ കടമ. അവര്‍ക്ക് സൗജന്യങ്ങള്‍ വാരിവിതറാന്‍ മാത്രം പണം ഖജനാവില്‍ ഉണ്ടോ? ലോകത്ത് ഒരു സര്‍ക്കാരിന്റെ പക്കലും ഒരു രാഷ്‌ട്രീയക്കാരന്റെ കയ്യിലും മാന്ത്രികവടി ഇല്ല. ജനങ്ങള്‍ അവരില്‍ നിന്നും കൂടുതല്‍ പ്രതീക്ഷിക്കുകയാണ്. അങ്ങിനെ ജനങ്ങള്‍ സര്‍ക്കാരില്‍ നിന്നും പ്രതീക്ഷിക്കുന്നതില്‍ തെറ്റില്ല. പക്ഷെ എല്ലായ്‌പോഴും അത് കിട്ടണമെന്ന് ജനങ്ങള്‍ ആഗ്രഹിച്ചുകൂടാ.”- അജിത് പറയുന്നു.
ഇതിന് തൊട്ടുമു‍ന്‍പ് നടന്‍ വിജയിന്റെ റാലിയില്‍ കരൂരില്‍ തിക്കിലും തിരക്കിലും പെട്ട് ആളുകള്‍ മരിച്ചത് വിജയിന്റെ മാത്രം കുറ്റമല്ലെന്നും അജിത് പ്രസ്താവിച്ചിരുന്നു. ഇതും വിജയിനെ കുറ്റപ്പെടുത്തി രക്ഷപ്പെടാന്‍ നോക്കിയ മുഖ്യമന്ത്രി സ്റ്റാലിനുള്ള വലിയ വിമര്‍ശനമായിരുന്നു.
ഇതോടെ അജിതും രാഷ്‌ട്രീയം ലക്ഷ്യം വെയ്‌ക്കുകയാണെന്ന് ചില അഭ്യൂഹങ്ങള്‍ പരക്കുകയാണ്.
