‘ഒരു മുട്ട കഴിച്ചാൽ 7 വയസ്സ് കുറയും’ വിയറ്റ്നാമിലെ ഡാ നങ് എന്ന മലയോര പട്ടണത്തിലാണ് ഈ പുഴുങ്ങിയ മുട്ട കിട്ടുന്നത്. സാധാരണയായി നമ്മള് ചെയ്യുന്നത് പോലെ അടുപ്പില് വച്ചല്ല ഈ മുട്ടകള് വേവിച്ചെടുക്കുന്നത്. ഡാ നങ്ങിൽ നിന്ന് അധികം ദൂരെയല്ലാതെ സ്ഥിതി ചെയ്യുന്ന ന്യൂയി തൻ തായ് ഹോട്ട് സ്പ്രിങ്സ് പാർക്കിലെ സ്വാഭാവിക ചൂടുറവകളിലാണ് ഈ മുട്ടകള് വേവിക്കുന്നത്.
മലയിടുക്കുകളിലൂടെ ഒഴുകിയെത്തുന്ന ഈ ചൂടുനീരുറവകളിലെ വെള്ളത്തില് ധാരാളം ധാതുക്കളുടെ സാന്നിധ്യമുണ്ട്. 65°C മുതൽ 75°C വരെ താപനിലയുള്ള ഉറവയിൽ, ഏകദേശം 15-20 മിനിറ്റ് സമയം കൊണ്ടാണ് മുട്ട വേവിക്കുന്നത്. ഈ പ്രത്യേക രീതിയിൽ വേവിക്കുമ്പോൾ മുട്ടയ്ക്ക് ഒരു പ്രത്യേക സ്വാദും ഗുണവും ലഭിക്കുമത്രേ.
ഈ മുട്ട കഴിക്കുന്നത് ആരോഗ്യത്തിന് വളരെ നല്ലതാണെന്നാണ് സ്ഥലവാസികളുടെ വാദം. മുട്ടയിലെ മഞ്ഞക്കരുവും വെള്ളയും യഥാക്രമം ‘യിൻ’, ‘യാങ്’ എന്നിവയെ പ്രതിനിധാനം ചെയ്യുന്നുണ്ടെന്നും, ചൂടുനീരുറവകളിലെ ധാതുക്കളുമായി ചേരുമ്പോൾ ഇതിന് പ്രത്യേക ഗുണം ലഭിക്കുമെന്നുമാണ് ഇവർ വിശ്വസിക്കുന്നത്. ഈ ലോഞ്ചിവിറ്റി എഗ്ഗ് കഴിക്കുന്നത് ദീർഘായുസ്സ് നൽകുമെന്നും കുറഞ്ഞത് 7 വയസ്സ് കുറഞ്ഞതായി തോന്നുമെന്നും ഒരു ഐതിഹ്യം പോലെ ഇവർ പറയുന്നു.എന്നാല്, ഇതിനു ഇതുവരെ ശാസ്ത്രീയ വിശദീകരണങ്ങള് ഒന്നും ലഭിച്ചിട്ടില്ല.
ന്യൂയി തൻ തായി ഹോട്ട് സ്പ്രിങ്സ് പാർക്കിൽ എത്തുന്ന സന്ദർശകർക്ക് ഇവിടത്തെ ചൂടുനീരുറവകളിൽ കുളിക്കാനും, ജാപ്പനീസ് രീതിയിലുള്ള ‘ഓൺസെൻ’ ബാത്ത് എടുക്കാനും, വെള്ളത്തിൽ മുട്ട വേവിച്ച് കഴിക്കാനും സൗകര്യമുണ്ട്. ഓൺസെൻ ബാത്ത് കഴിഞ്ഞ് വിശക്കുമ്പോൾ ഈ ചൂടുള്ള മുട്ട കഴിക്കുന്നത് വളരെ ഉന്മേഷം നൽകും.
