തിരുവനന്തപുരം: കേരളം അതിദാരിദ്ര്യമുക്ത സംസ്ഥാനമെന്ന നുണ പ്രഖ്യാപനത്തിനു വേദിയൊരുക്കാന്‍ ചെലവിട്ടത് ഒന്നരക്കോടി രൂപ. അതും പാവങ്ങള്‍ക്കു വീടു പണിയാനുള്ള ഫണ്ടില്‍ നിന്നു വകമാറ്റിയെടുത്തത്.
സെന്‍ട്രല്‍ സ്റ്റേഡിയത്തിലെ ആഘോഷങ്ങള്‍ക്ക്, തദ്ദേശ സ്ഥാപനങ്ങള്‍ക്കു വീടു പണിക്കു നീക്കിവച്ച 52.8 കോടിയില്‍ നിന്ന് 1.5 കോടി വെട്ടിക്കുറച്ചാണ് പണം കണ്ടെത്തിയത്. വീടുപണിക്ക് 52.8 കോടി രൂപ അനുവദിച്ചെന്ന് ആദ്യം ഉത്തരവിറക്കി. ഉത്തരവ് തിരുത്തി 1.50 കോടി കുറച്ചു വീണ്ടും ഉത്തരവിറക്കുകയായിരുന്നു. പരിപാടിയിലെ ഗാനമേളയ്‌ക്കു വരെ പണം നല്കുന്നത് വീടുപണിക്കുള്ള ഫണ്ടില്‍ നിന്നാണ്. ചെറിയ തുകയേ മാറ്റിയുള്ളെന്നാണ് മന്ത്രി എം.ബി. രാജേഷിന്റെ പ്രതികരണം കേരളപ്പിറവി ദിനത്തില്‍ സെന്‍ട്രല്‍ സ്റ്റേഡിയത്തിലെ ചടങ്ങില്‍, കേരളം അതിദാരിദ്ര്യമുക്തമായെന്നു മുഖ്യമന്ത്രി പിണറായി വിജയന് പ്രഖ്യാപിച്ചു. ഇതാണ് കേരള സ്റ്റോറിയെന്നും മുഖ്യമന്ത്രി പറഞ്ഞു. മുഖ്യാതിഥികളായി പങ്കെടുക്കാന്‍ ക്ഷണിച്ചിരുന്ന മോഹന്‍ലാലും കമല്‍ഹാസനും വിട്ടുനിന്നു. മമ്മൂട്ടി പങ്കെടുത്തു. മോഹന്‍ലാല്‍ ദുബായ്‌യിലും കമല്‍ഹാസന്‍ ചെന്നൈയിലുമായതിനാല്‍ അസൗകര്യമുണ്ടെന്നാണ് സര്‍ക്കാര്‍ ഭാഷ്യം. എന്നാല്‍ തട്ടിപ്പാണെന്ന് വ്യക്തമായതിനാലാണ് ഇരുവരും വിട്ടുനിന്നതെന്നാണ് സൂചന.
പരിപാടിക്ക് ആളെക്കൂട്ടാന്‍ പഞ്ചായത്ത് ജോയിന്റ് ഡയറക്ടര്‍ കര്‍ശന ഉത്തരവിറക്കിയിരുന്നു. നാല്‍പ്പതിനായിരം പേര്‍ വേണമെന്നും തിരുവനന്തപുരം ജില്ലയിലെ ഓരോ പഞ്ചായത്തില്‍ നിന്ന് 200 പേരും, നഗര സഭകളിലെയും കോര്‍പ്പറേഷനിലെയും ഓരോ വാര്‍ഡില്‍ നിന്ന് 100 പേരെയും എത്തിക്കണമെന്നായിരുന്നു ഉത്തരവ്. പതിവുപോലെ കുടുംബശ്രീ പ്രവര്‍ത്തകര്‍ തന്നെ ഉത്തരവിന്റെ ഇരകളായി. പിഎം ശ്രീയില്‍ കലഹിച്ചു നിന്ന സിപിഎം-സിപിഐ നേതാക്കളുടെ ഇണക്കം കൂടിയായി സമ്മേളന വേദി. സിപിഐ സംസ്ഥാന സെക്രട്ടറി ബിനോയ് വിശ്വത്തെ മന്ത്രി വി. ശിവന്‍കുട്ടി വേദിക്കു പുറത്തുനിന്നേ കൈപിടിച്ചാനയിച്ച് ഇരിപ്പിടത്തില്‍ കൊണ്ടിരുത്തി.
