പട്ന: നിയമസഭാ തെരഞ്ഞെടുപ്പിന് ദിവസങ്ങള്‍ മാത്രം ശേഷിക്കെ ബീഹാറില്‍ പ്രചാരണത്തിന് ചൂടേറുന്നു. ബിജെപിയുടെയും എന്‍ഡിഎയുടെയും കൂടുതല്‍ ദേശീയ നേതാക്കള്‍ പ്രചാരണത്തിനായി ഇന്നലെ സംസ്ഥാനത്ത് എത്തി. കേന്ദ്ര ആഭ്യന്തരമന്ത്രി അമിത്ഷാ ദിവസങ്ങളായി സംസ്ഥാനത്ത് തങ്ങി തെരഞ്ഞെടുപ്പ് റാലികളിലും ജനസഭകളിലും പങ്കെടുക്കുന്നു.
മുതിര്‍ന്ന ബിജെപി നേതാവും കേന്ദ്ര പ്രതിരോധ മന്ത്രിയുമായ രാജ്നാഥ് സിങ്, ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്, ദല്‍ഹി മുഖ്യമന്ത്രി രേഖ ഗുപ്ത, വിവിധ കേന്ദ്രമന്ത്രിമാര്‍ തുടങ്ങിയവര്‍ ഇന്നലെ വിവിധ പരിപാടികളില്‍ പങ്കെടുത്തു.
ബിജെപി ദേശീയ അദ്ധ്യക്ഷന്‍ ജെ.പി. നഡ്ഡ ഇന്നും നാളെയും സംസ്ഥാനത്തെ വിവിധ കേന്ദ്രങ്ങളില്‍ റാലികളില്‍ പങ്കെടുക്കും. തെരഞ്ഞെടുപ്പ് പ്രചാരണത്തിനായുള്ള നഡ്ഡയുടെ രണ്ടാമത്തെ സന്ദര്‍ശനമാണിത്. പ്രധാനമന്ത്രി നരേന്ദ്രമോദി നവംബര്‍ രണ്ടിന് പട്നയില്‍ റോഡ്ഷോ നടത്തും. സംസ്ഥാനത്തെ ഏറ്റവും വലിയ റോഡ്ഷോയാക്കാനുള്ള ഒരുക്കങ്ങളാണ് ബിജെപി നടത്തുന്നത്. കേന്ദ്രമന്ത്രി ധര്‍മേന്ദ്രപ്രധാന്റെ നേതൃത്വത്തില്‍ റോഡ്ഷോയ്‌ക്കുള്ള ക്രമീകരണങ്ങള്‍ വിലയിരുത്തി. തെരഞ്ഞെടുപ്പ് പ്രഖ്യാപിച്ചശേഷമുള്ള പ്രധാനമന്ത്രിയുടെ രണ്ടാമത്തെ സന്ദര്‍ശനമാണിത്.
ബീഹാര്‍ മുഖ്യമന്ത്രിയും ജെഡിയു നേതാവുമായ നിതീഷ് കുമാര്‍, കേന്ദ്രമന്ത്രിയും എല്‍ജെപി (ആര്‍വി) നേതാവുമായ ചിരാഗ് പാസ്വാന്‍, കേന്ദ്രമന്ത്രിയും എച്ച്എഎം നേതാവുമായ ജിതന്‍ റാം മാഞ്ചി, ആര്‍എല്‍എം നേതാവ് ഉപേന്ദ്ര കുശ്വാഹ, ഉപമുഖ്യമന്ത്രിമാരായ സാമ്രാട്ട് ചൗധരി, വിജയ കുമാര്‍ സിന്‍ഹ തുടങ്ങിയവര്‍ ദിവസവും തെരഞ്ഞെടുപ്പ് പ്രചാരണ പരിപാടികളില്‍ പങ്കെടുക്കുന്നു.
