കാബൂള്: താലിബാന് പിന്തുണയുള്ള തെഹ്രീക് -ഇ- താലിബാന് പാകിസ്ഥാന് (ടിടിപി) എന്ന ഭീകരസംഘടന പാകിസ്ഥാനില് ആക്രമണങ്ങള് നടത്തുന്ന കാലത്തോളം അഫ്ഗാനുള്ളിലെ കാബൂളില് പ്രവര്ത്തിക്കുന്ന ടിടിപി കേന്ദ്രങ്ങള് ലക്ഷ്യമാക്കി ആക്രമണം നടത്തുമെന്ന് പാകിസ്ഥാന്. പാകിസ്ഥാന്റെ ഈ വാദം താലിബാന് തള്ളിയതോടെ പാകിസ്ഥാന്-താലിബാന് യുദ്ധം തുടരുമെന്ന് ഉറപ്പായി.
അഫ്ഗാനിസ്ഥാന്റെ പരമാധികാരം ലംഘിച്ച് രാജ്യത്തിനുള്ളില് ആക്രമണം നടത്താന് ആരെയും അനുവദിക്കില്ലെന്ന് താലിബാന് ശക്തമായി വാദിച്ചു. ഇതോടെ പാകിസ്ഥാനും താലിബാനും തമ്മില് ചൊവ്വാഴ്ച നടന്ന സമാധാന ചര്ച്ച അലസി.
ടിടിപി പാകിസ്ഥാനില് ആക്രമണം നടത്തുന്നിടത്തോളം അമേരിക്ക നിര്മ്മിച്ച ഡ്രോണ് പാകിസ്ഥാനില് നിന്നും അഫ്ഗാനിസ്ഥാനുള്ളിലേക്ക് അയയ്ക്കുമെന്ന് പാകിസ്ഥാന് സംഘം തീര്ത്ത് പറഞ്ഞു. ഇക്കാര്യത്തില് അമേരിക്കയുമായി കരാറില് ഒപ്പുവെച്ചിട്ടുണ്ടെന്നായിരുന്നു പാകിസ്ഥാന്റെ വിശദീകരണം. ഈ വാദത്തോടെ അഫ്ഗാനിസ്ഥാന്റെ പരമാധികാരം ലംഘിച്ച് അഫ്ഗാനിസ്താനുള്ളില് ആക്രമണം നടത്തുന്നത് നിയമവിരുദ്ധമാണെന്ന താലിബാന്റെ വാദം പാകിസ്ഥാന് തള്ളുകയായിരുന്നു. അഫ്ഗാനിസ്ഥാനുള്ളില് ആക്രമണം നടത്തിയാല് ശക്തമായി തിരിച്ചടിക്കുമെന്നായിരുന്നു താലിബാന് മറുപടി.
