പട്ന തേജസ്വി യാദവ് ചൊവ്വാഴ്ച പുറത്തിറക്കിയ മഹാസഖ്യത്തിന്റെ പ്രകടനപത്രികയില്‍ ചന്ദ്രനെയും താരങ്ങളെയും പിടിച്ചുതരാമെന്ന മട്ടിലുള്ളതാണെന്ന പരിഹാസം ഉയരുന്നു.
പ്രകടനപത്രിക പുറത്തിറക്കല്‍ ചടങ്ങിന് ശേഷം ഒരു മാധ്യമപ്രവര്‍ത്തകന്‍ തന്നെ തേജസ്വി യാദവിനോട് ഈ ചോദ്യം ചോദിക്കുകയും ചെയ്തു. “ബീഹാറിന്റെത് വെറും 3 ലക്ഷം കോടി രൂപയുടെ മാത്രം ബജറ്റാണ്. ഇതിന് പകരം 30 ലക്ഷം കോടി രൂപയുടെ വാഗ്ദാനമാണല്ലോ പ്രകടനപത്രികയില്‍ വാരിക്കോരി നല്‍കിയിരിക്കുന്നത്?”- പക്ഷെ മാധ്യമപ്രവര്‍ത്തകന്റെ ഈ ചോദ്യത്തിന് മുന്‍പില്‍ തേജസ്വി യാദവിന് ഒരു കുലുക്കവുമില്ല.
സ്വതസിദ്ധമായ ശൈലിയില്‍ തേജസ്വി യാദവ് പറഞ്ഞത് ഇതാണ്. “ആളുകള്‍ ചന്ദ്രനിലേക്ക് വരെ പോകുന്ന കാലമാണിത്. ഇക്കാലത്ത് എന്തും ഏതും സാധ്യമാണ്. ”
പ്രകടനപത്രികയിലെ മുഖ്യവാഗ്ദാനമായ എല്ലാ വീടുകളിലും സര്‍ക്കാര്‍ ജോലി എന്നതിനെക്കുറിച്ചും ഒരു മാധ്യമപ്രവര്‍ത്തകന്‍ ചോദിച്ചിരുന്നു. ഇതിനും വ്യക്തമായ മറുപടിയല്ല തേജസ്വി യാദവ് നല്‍കുന്നത്. അതെല്ലാം ഭരണത്തില്‍ വന്നതിന് ശേഷം കാണാം എന്നായിരുന്നു ഇദ്ദേഹത്തിന്റെ മറുപടി. ഏത് മേഖലകളില്‍ എങ്ങിനെ തൊഴില്‍ നല്‍കും എന്ന ഒരു പദ്ധതിയും തേജസ്വി യാദവ് പ്രകടനപത്രികയില്‍ പറഞ്ഞിട്ടില്ല.
നിറയെ മോഹനവാഗ്ദാനങ്ങളാണ് നല്‍കിയിരിക്കുന്നത്. 2500 രൂപ വീതം മാസം തോറും സ്ത്രീകള്‍ക്ക് നല്‍കുമെന്ന വാഗ്ദാനം കോടികളുടെ ബാധ്യതയാണ് സര്‍ക്കാരിന് വരുത്തുക. അതുപോലെ പഴയ പെന്‍ഷന്‍ പദ്ധതി പുനസ്ഥാപിക്കും എന്നതും ഖജനാവ് പൊളിക്കുന്ന വാഗ്ദാനമാണ്.
