തിരുവനന്തപുരം: ശബരിമലയിലെ സ്വര്‍ണക്കൊള്ളയ്‌ക്കെതിരെ ബിജെപിയുടെ നേതൃത്വത്തില്‍ സെക്രട്ടേറിയറ്റിനു മുന്നില്‍ നടത്തുന്ന രാപകല്‍ ഉപരോധ സമരം ആരംഭിച്ചു. കോരിച്ചൊരിയുന്ന മഴയിലും ആവേശം ചോരാതെ രാത്രി ഏഴ് മണിയോടെ മുദ്രാവാക്യം വിളികളോടെയാണ് സെക്രട്ടേറിയറ്റിന് മുന്നിലെ സമരഗേറ്റിലേക്ക് ബിജെപി നേതാക്കളും പ്രവര്‍ത്തകരും എത്തിയത്. എംജി റോഡിന് മുന്നില്‍ ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറിന്റെ നേതൃത്വത്തില്‍ പ്രവര്‍ത്തകര്‍ പ്രതിഷേധം തുടങ്ങി. വിവിധ ജില്ലകളില്‍ നിന്ന് ആയിരത്തോളം പ്രവര്‍ത്തകര്‍ ഉപരോധ സമരത്തില്‍ പങ്കെടുക്കാനെത്തിയിരുന്നു. ശക്തമായ മഴയിലും സര്‍ക്കാരിനെതിരെയുള്ള താക്കീതായി സമരം മാറി.
അയ്യപ്പനാമജപങ്ങളും സര്‍ക്കാരിനെതിരെയുള്ള മുദ്രാവാക്യങ്ങളും മുഴക്കി പ്രവര്‍ത്തകര്‍ പ്രതിഷേധം രേഖപ്പെടുത്തി. മഴ ശക്തമായെങ്കിലും സമരം തുടര്‍ന്നു. രാജീവ് ചന്ദ്രശേഖറും റോഡില്‍ കുത്തിയിരുന്നതോടെ പ്രവര്‍ത്തകര്‍ക്ക് ആവേശമായി.
ബിജെപി ദേശീയ നിര്‍വാഹക സമിതിയംഗങ്ങളായ പി.കെ. കൃഷ്ണ ദാസ്, കുമ്മനം രാജശേഖരന്‍, സംസ്ഥാന ജനറല്‍ സെക്രട്ടറിമാരായ എം.ടി. രമേശ്, അഡ്വ. എസ്. സുരേഷ്, ശോഭാ സുരേന്ദ്രന്‍, അനൂപ് ആന്റണി, ഉപാധ്യക്ഷന്മാരായ അഡ്വ. ഷോണ്‍ ജോര്‍ജ്, സി. കൃഷ്ണകുമാര്‍, അഡ്വ. ബി. ഗോപാലകൃഷ്ണന്‍, യുവമോര്‍ച്ച സംസ്ഥാന പ്രസിഡന്റ് മനുപ്രസാദ്, നേതാക്കളായ പത്മിനി തോമസ്, വി. ടി. രമ, വി. വി. രാജേഷ്, കരമന ജയന്‍, മുക്കുംപാലമൂട് ബിജു, പി. കെ. റെജികുമാര്‍ തുടങ്ങിയവര്‍ പങ്കെടുത്തു. രാപകല്‍ സമരത്തിന്റെ ഔപചാരിക ഉദ്ഘാടനം ഇന്ന് രാവിലെ 10ന് രാജീവ് ചന്ദ്രശേഖര്‍ നിര്‍വഹിക്കും.
