ന്യൂദല്‍ഹി: ഇന്ത്യന്‍ അതിര്‍ത്തിയില്‍ ചൈന ഒരു പടുകൂറ്റന്‍ വ്യോമപ്രതിരോധ കെട്ടിടസമുച്ചയം പണിതീര്‍ത്തതായി റിപ്പോര്‍ട്ട്. ഇതിന്റെ ഉപഗ്രഹചിത്രം പുറത്തുവന്നിട്ടുണ്ട്. ഈ സമുച്ചയത്തില്‍ റഡാര്‍ സംവിധാനം, വാഹനഷെഡ്ഡുകള്‍, ആയുധസൂക്ഷിപ്പ് കേന്ദ്രം, കമാന്‍റ് ആന്‍റ് കണ്‍ട്രോള്‍ സംവിധാനം എന്നിവ ഉണ്ട്.
തിബറ്റിലെ കിഴക്കന്‍ പാംഗോങ് തടാകത്തിന്റെ കരയിലാണ് ഈ വ്യോമപ്രതിരോധ കേന്ദ്രം ചൈന പണിതിരിക്കുന്നത്. 2020ല്‍ ഇന്ത്യയുടെയും പാകിസ്ഥാന്റെയും പട്ടാളക്കാര്‍ ഏറ്റുമുട്ടിയ ഇടം കൂടിയാണ് പാംഗോങ്ങ് തടാകം. എച്ച് ക്യു 9 ഭൂതല-വ്യോമ മിസൈല്‍ സംവിധാനം കൂടി ഈ കെട്ടിടസമുച്ചയത്തിന് അകത്ത് ഒരുക്കിയിട്ടുണ്ടെന്നാണ് രഹസ്യവിവരം. മിസൈലുകള്‍ തൊടുക്കാന്‍ കഴിയുന്ന ട്രാന്‍സ്പോര്‍ട്ടര്‍ ഇറക്ടര്‍ ലോഞ്ചറുകള്‍ എന്നിവയും ഇതിലുണ്ട്. ഈ കെട്ടിടത്തിന്റെ മേല്‍ക്കൂര തുറക്കുകയും അടയ്‌ക്കുകയും ചെയ്യാന്‍ കഴിയുന്ന രീതിയിലാണ്. ഈ മേല്‍ക്കൂര തുറന്നാല്‍ അതിലൂടെ മിസൈല്‍ തൊടുക്കാന്‍ സാധിക്കും.
ഓള്‍ സോഴ്സ് അനാലിസിസ് എന്ന യുഎസ് കേന്ദ്രമായി പ്രവര്‍ത്തിക്കുന്ന ജിയോ ഇന്‍റലിജന്‍സ് കേന്ദ്രത്തിലെ ഗവേഷകരാണ് ഇങ്ങിനെ ഒരു ചൈനീസ് വ്യോമപ്രതിരോധകേന്ദ്രത്തെ ആദ്യം കണ്ടെത്തിയത്. ഇന്ത്യാ-പാക് യഥാര്‍ത്ഥ നിയന്ത്രണരേഖയില്‍ നിന്നും വെറും 65 കിലോമീറ്റര്‍ മാത്രം അകലെയാണ് ഈ കേന്ദ്രം. ഈയിടെ ഇന്ത്യ പണിത ന്യോമ വ്യോമബേസിന്റെ തൊട്ടടുത്താണ് ചൈനയുടെ ഈ വ്യോമപ്രതിരോധകേന്ദ്രം.
