തൃശൂര്: ഗുരുവായൂരില് പലിശക്കാരുടെ ഭീഷണി മൂലം വ്യാപാരി ആത്മഹത്യ ചെയ്ത സംഭവത്തില് ആരോപണ വിധേയരായ പലിശക്കാരുടെ വീടുകളില് പൊലീസ് പരിശോധന. തൈവളപ്പില് പ്രഗിലേഷ്, കണ്ടാണശേരി സ്രാമ്പിക്കല് ദിവേക് എന്നിവരുടെ വീടുകളിലാണ് പൊലീസ് പരിശോധന നടന്നത്. ദിവേകിന്റെ വീട്ടില് നിന്ന് വാഹനങ്ങളുടെ ആര്സി ബുക്കും കണക്കില് പെടാത്ത പണവും മറ്റു രേഖകളും പൊലീസ് കണ്ടെടുത്തു.
പ്രഗിലേഷിന്റെ വീട് അടച്ചിട്ടിരുന്നതിനാല് വീടിനു പുറത്ത് പൊലീസ് പരിശോധന നടത്തി കാവല് ഏര്പ്പെടുത്തി. കഴിഞ്ഞ 10നാണ് കര്ണംകോട്ട് ബസാര് മേക്കണ്ടനകത്ത് മുസ്തഫയെ വീടിനുള്ളില് തൂങ്ങിമരിച്ച നിലയില് കണ്ടെത്തിയത്.
പലിശക്കാരുടെ ഭീഷണി മൂലം മരിക്കാന് തീരുമാനിച്ചെന്ന് ആത്മഹത്യക്കുറിപ്പ് ലഭിച്ചിരുന്നു. ആറ് ലക്ഷം രൂപ പലിശക്ക് എടുത്ത് 40 ലക്ഷം രൂപ അടയ്ക്കേണ്ടി വരികയും നിരന്തരം ഭീഷണിപ്പെടുത്തുകയും ചെയ്ത സാഹചര്യത്തിലാണ് മുസ്തഫ ആത്മഹത്യ ചെയ്തതെന്നാണ് കുടുംബത്തിന്റെ ആരോപണം.
നേരത്തെ അസ്വാഭാവിക മരണത്തിന് കേസെടുത്ത ടെമ്പിള് പൊലീസ് പരാതിയെ തുടര്ന്ന് ആത്മഹത്യാപ്രേരണ കുറ്റത്തിന് പ്രഗിലേഷിനെ ഒന്നാം പ്രതിയാക്കിയും ദിവിഷിനെ രണ്ടാം പ്രതിയാക്കിയും കേസെടുത്തിരുന്നു.
