തിരുവനന്തപുരം: ശ്രീനാരായണഗുരുദേവന്റെ മഹാസമാധിയുടെ ശതാബ്ദി മൂന്നു വര്ഷം നീണ്ടുനില്ക്കുന്ന ആഘോഷ പരിപാടികളൊടെ ആഗോളതലത്തില് സംഘടിപ്പിക്കുന്നതായി ശ്രീനാരായണ ധര്മ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ .
ശതാബ്ദി ആഘോഷങ്ങള്ക്ക് ഭാരതത്തിന്റെ പ്രഥമ വനിത ദ്രൗപതി മുര്മു ഇന്ന് ശിവഗിരിയില് ഉദ്ഘാടനം ചെയ്യുമ്പോള് ലോകമെമ്പാടുമുള്ള ഗുരുദേവ വിശ്വാസികള് അഭിമാനത്താല് സന്തോഷിക്കുകയാണ്. ഇനിയുള്ള മൂന്നു വര്ഷക്കാലം ഗുരുദേവ പ്രസ്ഥാനങ്ങളുടെ ആചരണ ആഘോഷങ്ങളില് മുഖ്യപങ്ക് ഗുരുദേവ സമാധിയുടെ ശതാബ്ദി സംബന്ധിച്ച പദ്ധതികളുടെ നിര്വഹണമാകുമെന്ന് സ്വാമി സച്ചിദാനന്ദ പറഞ്ഞു.
ശതാബ്ദിയുടെ ഉദ്ഘാടനം നിര്വഹിക്കുന്നതിന് ഏറ്റവും അനുയോജ്യയായ വ്യക്തി ഭാരതത്തിന്റെ രാഷ്ട്രപതി തന്നെയാകണമെന്ന് ശിവഗിരി മഠം ഏറെ ആഗ്രഹിച്ചിരുന്നു. ശിവഗിരി മഠത്തിന്റെ അഭിലാഷമാണ് ഇന്ന് യാഥാര്ത്ഥ്യമാവുന്നത്.
അരുവിപ്പുറത്ത് നിര്ജ്ജനമായൊരു നദീതീരത്തു നിന്നും സമാരംഭം കുറിച്ച ഗുരുദേവ പ്രസ്ഥാനം ഇപ്പോള് കേരളത്തിന്റെയും ഭാരതത്തിന്റെയും അതിര്ത്തികള് ഭേദിച്ചുകൊണ്ട് വിശാലമായ ലോകത്തിലേക്ക് കടന്നുചെന്നിരിക്കുന്നു. ഇന്ന് കേരളക്കരയില് ഗുരുദേവ പ്രസ്ഥാനങ്ങള് ഇല്ലാത്ത ഒരു ഗ്രാമം പോലും ഇല്ല. ഇന്ത്യയിലെ മിക്കവാറും എല്ലാ സംസ്ഥാനങ്ങളിലും ലോകത്തിന്റെ നാനാഭാഗങ്ങളിലായി ആത്മീയ സ്ഥാനങ്ങളും സ്കൂളുകളും കോളജുകളുമായി ചെറുതും വലുതുമായ നൂറുകണക്കിന് പ്രസ്ഥാനങ്ങള് സ്ഥാപിതമായിട്ടുണ്ട്. മിക്കവാറും എല്ലാ ഗള്ഫ് രാജ്യങ്ങളിലും ഗുരുദേവ പ്രസ്ഥാനങ്ങളുണ്ട്.
അമേരിക്കയില് 12 സംസ്ഥാനങ്ങളില് ഗുരുദേവ പ്രസ്ഥാനങ്ങളും ചിലയിടങ്ങളില് ഗുരുമന്ദിരങ്ങളും ആസ്ഥാന മന്ദിരങ്ങളും സ്ഥാപിതമായിട്ടുണ്ട്. ശിവഗിരി മഠത്തിന്റെ ശാഖാ സ്ഥാപനങ്ങള് ലണ്ടനിലും വാഷിംഗ്ടണിലും ഈ അടുത്തകാലത്ത രൂപം പ്രാപിച്ചിട്ടുണ്ട്. ആലുവ സര്വമത സമ്മേളനത്തിന്റെ ശതാബ്ദി ആഘോഷം ഫ്രാന്സിസ് മാര്പാപ്പയുടെ ആശിര്വാദത്തോടെ വത്തിക്കാനില് നടന്നത് ലോകപ്രശസ്തമായി. തുടര്ന്ന് ലണ്ടനിലും ദുബായിലും ഇപ്പോള് ആസ്ട്രേലിയയിലെ വിക്ടോറിയന് പാര്ലമെന്റില് വെച്ചും ശതാബ്ദി ആഘോഷ പരിപാടികള് നടന്നു കഴിഞ്ഞു.
നൂറുവര്ഷം ആകുമ്പോഴേക്കും ഗുരുദേവദര്ശനം ലോകം അറിഞ്ഞുകൊള്ളുമെന്ന് പല മഹാത്മാക്കളും വെളിപ്പെടുത്തിയിട്ടുണ്ട്. ആ പ്രവചനങ്ങളെ അര്ത്ഥമാക്കിക്കൊണ്ടാണ് ഇപ്പോള് ഗുരുദേവ സന്ദേശപ്രചരണം ശിവഗിരി മഠത്തിന്റെ ആഭിമുഖ്യത്തില് നടക്കുന്നത്. ശ്രീനാരായണ ധര്മ്മപരിപാലനയോഗം, ശിവഗിരി മഠത്തിന്റെ പോഷക സംഘടനയായ ഗുരുധര്മ്മ പ്രചരണ സഭ, വര്ക്കല നാരായണ ഗുരുകുലം, ഗുരുദേവനാല് സ്ഥാപിതമായ ക്ഷേത്രങ്ങള്, ഗുരു മന്ദിരങ്ങള്, ശ്രീനാരായണ സാംസ്കാരിക സമിതി, ശ്രീനാരായണ ക്ലബ്ബുകള്, ഗ്രാമീണതലത്തില് പ്രവര്ത്തിക്കുന്ന മുഴുവന് ഗുരുദേവ പ്രസ്ഥാനങ്ങളും ശതാബ്ദിയാചരണ പരിപാടികള് സംഘടിപ്പിക്കുന്നുണ്ട്.
ഇനി വരുന്ന മൂന്നു വര്ഷക്കാലം മുഴുവന് പ്രസ്ഥാനങ്ങളുടെയും പ്രധാന പരിപാടികളില് ഉള്പ്പെടുന്നത് ഗുരുദേവന്റെ പരിനിര്വ്വാണ ശതാബ്ദിയാണെന്ന് സ്വാമി സച്ചിദാനന്ദ പറഞ്ഞു.
