കല്ലമ്പലം: അപകടത്തില്‍പ്പെട്ട ബൈക്കിന് കാവലായി യജമാനന്റെ വളര്‍ത്തു നായ. നാവായിക്കുളം വൈരമല വടംകര മൂല വീട്ടില്‍ സെയ്ദലി(27)യുടെ വളര്‍ത്തുനായയാണ് താന്‍ അപകടത്തില്‍പ്പെട്ട് അശൂപത്രിയിലായപ്പോള്‍ തിരികെ വരുന്നതുവരെ തകര്‍ന്ന ബൈക്കിന് കാവലായി നിന്നത്.
വ്യാഴാഴ്ച രാത്രി പത്തരയോടെ കൂട്ടുകാരുമൊത്ത് ബൈക്കില്‍ വീട്ടിലേക്കു പോകവേ നാവായിക്കുളത്ത് വച്ചായിരുന്നു അപകടം. ഏതോ ഓട്ടോറിക്ഷ ബൈക്കിലിടിച്ചിട്ട് നിര്‍ത്താതെ പോകുകയായിരുന്നു. റോഡില്‍ വീണ് നിസാര പരിക്കുകള്‍ പറ്റിയ സെയ്ദലിയും കൂട്ടുകാരും തകര്‍ന്ന ബൈക്ക് റോഡരികില്‍ വച്ചിട്ട് മറ്റൊരു വണ്ടി വിളിച്ച് അശൂപത്രിയില്‍ പോകുകയായിരുന്നു. വീട്ടിലെത്തേണ്ട സമയമായിട്ടും സെയ്ദലിയെ കാണാഞ്ഞ് തിരക്കിയിറങ്ങിയ നായ ഒരു കിലോമീറ്ററോളം സഞ്ചരിച്ച് ബൈക്കിന് അടുത്തെത്തി. രാത്രിയും അടുത്ത ദിവസം പകല്‍ 12 മണിക്ക് സെയ്ദലി അശൂപത്രിയില്‍ നിന്നും വരുന്നതുവരെയും നായ ബൈക്കിനടുത്തു തന്നെ നിലയുറപ്പിച്ചു.
ക്ഷീണിതനായ നായയ്‌ക്ക് കാഴ്ചക്കാരായ ചിലര്‍ ഇതിനിടയില്‍ വെള്ളവും ഭക്ഷണവും നല്‍കിയെങ്കിലും കഴിച്ചില്ല. സെയ്ദലി എത്തിയപ്പോള്‍ സ്‌നേഹ പ്രകടനങ്ങള്‍ക്ക് ശേഷം നായ വീട്ടിലേക്കു മടങ്ങി. അപകടവും നായ ബൈക്കിനു കാവല്‍ നില്‍ക്കുന്ന വിവരവും അറിഞ്ഞ് കാണാനെത്തിയത് ഒട്ടേറെപ്പേരാണ്.
