എറണാകുളം: ഹിജാബ് വിവാദത്തില്‍ പള്ളുരുത്തി സെന്റ് റീത്താസ് സ്‌കൂളിന് ഹൈക്കോടതിയില്‍ നിന്ന് തിരിച്ചടി. ശിരോവസ്ത്രം ധരിച്ച കുട്ടിയെ സ്‌കൂളില്‍ പ്രവേശിപ്പിക്കണമെന്ന ഡിഡിഇയുടെ ഉത്തരവ് സ്റ്റേ ചെയ്തില്ല.
സ്‌കൂളിന്റെ ഹര്‍ജിയില്‍ സര്‍ക്കാരിനോട് വിശദീകരണം തേടി.ശിരോവസ്ത്ര വിവാദം ഉണ്ടായതിനെ തുടര്‍ന്ന് പള്ളുരുത്തി സെന്റ് റീത്താസ് സ്‌കൂളിലെ പഠനം 8ാം ക്ലാസുകാരി ഒഴിവാക്കി. മാനസിക ബുദ്ധിമുട്ട് ഉളളതിനാല്‍ സ്‌കൂളില്‍ തുടരാന്‍ ആഗ്രഹിക്കുന്നില്ലെന്ന് കുട്ടിയുടെ പിതാവ് അനസ് പറഞ്ഞു. തനിക്കും കുടുംബത്തിനും സ്‌കൂള്‍ മാനേജ്‌മെന്റ് നീതി നിഷേധിച്ചതായും മകള്‍ ക്ലാസില്‍ എത്താതിരുന്നപ്പോള്‍ ഒരു തവണ പോലും സ്‌കൂളില്‍ നിന്നും ആരും വിളിച്ചില്ലെന്നും അനസ് പറഞ്ഞു.കുട്ടിക്കും കുടുംബത്തിനുമെതിരെ വ്യാജ പ്രചാരണങ്ങള്‍ നടക്കുന്നു എന്നും നിയമനടപടി സ്വീകരിക്കും എന്നും കുട്ടിയുടെ പിതാവിന്റെ അഭിഭാഷകന്‍ അറിയിച്ചു.
വിഷയത്തില്‍ സ്‌കൂളിന് സംരക്ഷണം നല്‍കിയ ഹൈക്കോടതിക്ക് രാവിലെ സ്‌കൂള്‍ പ്രിന്‍സിപ്പാള്‍ സിസ്റ്റര്‍ ഹെലീന ആല്‍ബി നന്ദി അറിയിച്ചു. വിദ്യാഭ്യാസ മന്ത്രിക്കും നന്ദി പറഞ്ഞു. സ്‌കൂള്‍ നിയമങ്ങള്‍ അനുസരിക്കാന്‍ തയാറാണെങ്കില്‍ വിദ്യാര്‍ത്ഥിനിക്ക് സ്‌കൂളില്‍ പഠനം തുടരാമെന്ന് സിസ്റ്റര്‍ ഹെലീന ആല്‍ബി മാധ്യമങ്ങളോട് പറഞ്ഞു.
സ്‌കൂളിലെ നിയമങ്ങള്‍ അനുസരിച്ച് വിദ്യാര്‍ത്ഥിനി വന്നാല്‍ തുടരാം. കുട്ടികള്‍ക്ക് വേണ്ടതെല്ലാം സ്‌കൂള്‍ നല്‍കുന്നു. കുട്ടി സ്‌കൂളില്‍ നിന്ന് ടിസി വാങ്ങാന്‍ തീരുമാനിച്ച കാര്യം അറിയില്ല. കോടതിയെയും സര്‍ക്കാരിനെയും ബഹുമാനിക്കുന്നുവെന്നും കോടതിയുടെ മുന്നിലുള്ള വിഷയങ്ങളില്‍ നിയമം അതിന്റെ വഴിക്ക് പോകട്ടെയെന്നും സിസ്റ്റര്‍ ഹെലീന ആല്‍ബി പറഞ്ഞു.
അതേസമയം, എട്ടാം ക്ലാസുകാരിക്ക് പള്ളുരുത്തി സ്‌കൂളില്‍ പഠിക്കാനുള്ള എല്ലാ അവകാശവും ഉണ്ടെന്ന് വിദ്യാഭ്യാസ മന്ത്രി വി. ശിവന്‍കുട്ടി പറഞ്ഞു. സ്‌കൂള്‍ അധികൃതര്‍ കുട്ടിയെ വിളിച്ച് പ്രശ്‌നങ്ങള്‍ പരിഹരിക്കണം. കുട്ടി അനുഭവിക്കുന്ന മാനസിക സമ്മര്‍ദത്തിന് ഉത്തരവാദികള്‍ മറുപടി പറയണമെന്നും വി. ശിവന്‍കുട്ടി പറഞ്ഞു.
