നാഗര്‍കോവില്‍: ദീപാവലിക്ക് ഇനി മൂന്നുനാള്‍ ബാക്കി നില്‍ക്കെ കന്യാകുമാരി ജില്ലയിലെ വ്യാപാരകേന്ദ്രങ്ങളില്‍ പുതുവസ്ത്രങ്ങളും, വീട്ടുസാധനങ്ങളും വാങ്ങാനായി വന്‍ തിരക്കാണ് അനുഭവപ്പെടുന്നത്. നാഗര്‍കോവില്‍, മീനാക്ഷിപുരം, വടശ്ശേരി മാര്‍ക്കറ്റ് എന്നിവിടങ്ങളിലെ വസ്ത്ര വ്യാപാരക്കടകള്‍, ഫാന്‍സി സ്‌റ്റോര്‍, പ്രധാനബേക്കറികള്‍ എന്നിവിടങ്ങളിലാണ് ദീപവലി ആഘോഷത്തിനായി സാധനങ്ങള്‍ വാങ്ങാനായി എത്തുന്നത്.
ദീപാവലിയുടെ ഭാഗമായി മധുര പലഹാരങ്ങളുടെ ഒട്ടേറെ ശേഖരങ്ങള്‍ വില്‍പനയ്‌ക്ക് തയ്യാറായിട്ടുണ്ട്. ദീപാവലിക്ക് നാട്ടില്‍ എത്താന്‍ കഴിയാത്തവര്‍ക്കായി വീട്ടുകാര്‍ക്ക് പാഴ്‌സല്‍ അയയ്‌ക്കാന്‍ പ്രത്യേകം തയ്യാറാക്കിയ മധുര പലഹാരബോക്‌സുകളും വില്‍പ്പനയ്‌ക്കുണ്ട്. താല്‍ക്കാലിക പടക്ക് വില്‍പ്പന കേന്ദ്രങ്ങളിലും, മൊത്തവ്യാപാര വില്‍പ്പന കടകളിലും രണ്ടു ദിവസമായി വന്‍ തിരക്കാണ് അനുഭവപ്പെടുന്നത്.
കൃഷ്ണന്‍ നരകാസുരനെ സംഹരിച്ച ദിനമാണ് തമിഴ്‌നാട്ടില്‍ ദീപാവലി ആയി ആചരിക്കപ്പെടുന്നത്. തമിഴ്‌നാട്ടില്‍ ഭക്തിനിര്‍ഭരമായ ആഘോഷങ്ങളാണ് ദീപാവലി ദിനവും , തലേ നാളും നടക്കുന്നത്. ഇരുട്ടിനുമേല്‍ പ്രകാശത്തിന്റെ വിജയത്തെ പ്രതീകാത്മകമായി ആഘോഷിക്കുന്ന ഇവിടെ വീടുകളും വൈദ്യുത ദീപാലങ്കാരങ്ങള്‍ കൊണ്ട് പ്രകാശമാലകളാല്‍ അലങ്കരിക്കും. ദീപാവലി ദിവസം രാവിലെ എണ്ണയാല്‍ കുളിച്ച് പുതിയ വസ്ത്രങ്ങള്‍ ധരിച്ച് ആഘോഷിക്കുന്നതാണ് പതിവ്.
വീടുകളില്‍ വിളക്കുകള്‍ തെളിയിക്കുകയും മധുരപലഹാരങ്ങള്‍ ഒരുക്കുകയും പടക്കങ്ങള്‍ പൊട്ടിക്കുകയും ചെയ്യുന്നത് കൂടുതല്‍ ആഘോഷമാക്കുന്നു.
ജന്മഭൂമി ഓണ്‍ലൈന്‍