കൊച്ചി: കെ.സി. വേണുഗോപാല്‍ എംപി നല്‍കിയ മാനനഷ്ടക്കേസില്‍ ബിജെപി നേതാവ് ശോഭാ സുരേന്ദ്രന് ആലപ്പുഴ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ നേരിട്ട് ഹാജരാകുന്നതിന് രണ്ടു മാസത്തേക്ക് ഹൈക്കോടതി ഒഴിവ് നല്‍കി. നടപടിക്രമങ്ങള്‍ പാലിക്കാതെയാണ് മജിസ്‌ട്രേറ്റ് കോടതി തുടര്‍ നടപടികള്‍ക്ക് ഉത്തരവിട്ടത്. അതിനാല്‍ കേസ് റദ്ദാക്കണമെന്നാവശ്യപ്പെട്ട് ആലപ്പുഴയിലെ സ്ഥാനാര്‍ത്ഥി കൂടിയായിരുന്ന ശോഭാ സുരേന്ദ്രന് കോടതിയെ സമീപിക്കുകയായിരുന്നു. ജസ്റ്റിസ് വി.ജി. അരുണിന്റെതാണ് ഇടക്കാല ഉത്തരവ്.
മാനനഷ്ടക്കേസ് വിചാരണക്കോടതി പരിഗണിക്കുന്നതിനിടെ ഭാരതീയ നാഗരിക സുരക്ഷാ സംഹിത നിലവില്‍ വന്നതിനാല്‍ അതുപ്രകാരമുള്ള നടപടികള്‍ പാലിക്കേണ്ടതുണ്ട്. തുടര്‍ നടപടിക്ക് നിര്‍ദേശിക്കുമ്പോള്‍ ആരോപണവിധേയരായവരുടെ മറുപടി കൂടികേള്‍ക്കണമെന്നും ശോഭാ സുരേന്ദ്രന് കോടതിയില്‍ അറിയിച്ചു. ഇക്കാര്യം വിശദമായി പരിശോധിക്കേണ്ടതാണെന്ന് വിലയിരുത്തിയാണ് രണ്ട് മാസത്തേക്ക് കേസില്‍ ഹാജരാകുന്നതില്‍ ഒഴിവ് നല്‍കിയത്. ഇതുമായി ബന്ധപ്പെട്ട് കെ.സി. വേണു ഗോപാലിന് നോട്ടീസ് നല്‍കാനും കോടതി നിര്‍ദേശിച്ചു.
സീനിയര്‍ അഭിഭാഷകന്‍ എസ്. സനല്‍കുമാറാണ് ശോഭാ സുരേന്ദ്രന് വേണ്ടി ഹാജരായത്. കരിമണല്‍ കച്ചവടത്തിന് കൂട്ടുനിന്ന് കെ.സി. വേണുഗോപാല്‍ കോടികളുണ്ടാക്കിയെന്ന് ശോഭാ സുരേന്ദ്രന് നല്‍കിയ അഭിമുഖത്തില്‍ പറഞ്ഞെന്നാരോപിച്ചാണ് എംപി പരാതി നല്‍കിയത്. എന്നാല്‍ ഈ ആരോപണത്തിന് തെളിവുകളില്ല, അതിനാല്‍ മാനനഷ്ടക്കേസ് നിലനില്‍ക്കില്ലെന്നുമാണ് ശോഭാ സുരേന്ദ്രന്റെ വാദം.
