കൊച്ചി: എരിതീയില്‍ എണ്ണ ഒഴിച്ച് വര്‍ഗ്ഗീയത ആളിക്കത്തിക്കുന്ന നിലപാടായിരുന്നു പള്ളുരുത്തിയിലെ സെന്‍റ് റീത്താസ് സ്കൂളിലെ വിദ്യാര്‍ത്ഥിക്ക് ശിരോവസ്ത്രം ധരിച്ച് സ്കൂളില്‍ വരാന്‍ അനുമതി നല്‍കണമെന്ന വിദ്യാഭ്യാസമന്ത്രി ശിവന്‍കുട്ടിയുടേതെന്ന് അഡ്വ. വിമല ബിനു. വിദ്യാര്‍ത്ഥികള്‍ സ്കൂള്‍ അംഗീകരിച്ച യൂണിഫോം ധരിച്ച് സ്കൂളില്‍ എത്തുക എന്ന നിലപാട് ഉയര്‍ത്തിപ്പിടിക്കുന്ന കോടതിവിധിയ്‌ക്ക് വേണ്ടി പൊരുതാനാണ് അഡ്വ. വിമല ബിനു ശ്രമിക്കുന്നത്.
“സ്കൂള്‍ അധികൃതര്‍ പറഞ്ഞതുപോലെ മകള്‍ സ്കൂള്‍ യൂണിഫോം ധരിച്ച് വരുമെന്ന നിലപാട് കുട്ടിയുടെ പിതാവ് സമ്മതിച്ചതിന് ശേഷമാണ് വിദ്യാഭ്യാസമന്ത്രി ശിവന്‍കുട്ടി പുതിയൊരു നിലപാടുമായി എത്തിയത്. കുട്ടിയെ ശിരോവസ്ത്രം ധരിച്ച് വരാന്‍ സ്കൂള്‍ അധികൃതര്‍ സമ്മതിക്കണമെന്ന പ്രസ്താവനയിറക്കാന്‍ ശിവന്‍കുട്ടി മുതിര്‍ന്നത് എന്തിനാണ്?”- അഡ്വ. വിമല ബിനു ചോദിക്കുന്നു.
ജെന്‍ഡര്‍ യൂണിഫോം വരെ നടപ്പിലാക്കിയ സമൂഹമാണ് നമ്മുടേത്. കുട്ടികളില്‍ തുല്ല്യത ഉറപ്പിക്കാനാണ് സ്കൂള്‍ യൂണിഫോം. കേരള ഹൈക്കോടതി വരെ അംഗീകരിച്ച നിലപാടാണ് ഇത്. മന്ത്രി വര്‍ഗ്ഗീയത ആളിക്കത്തിക്കാന്‍ ശ്രമിക്കുകയായിരുന്നു. പ്രശ്നം പരിഹരിച്ച ശേഷം മതസ്പര്‍ദ്ധ ആളിക്കത്തിക്കാന്‍ ശ്രമിച്ച മന്ത്രി സമൂഹത്തില്‍ ഭിന്നിപ്പും വര്‍ഗ്ഗീയതയും ഉണ്ടാക്കി.- അഡ്വ. വിമല ബിനു പറയുന്നു.
