കൊച്ചി: വിദ്യാര്ഥിനി ഹിജാബ് (ശിരോവസ്ത്രം) ധരിച്ചു സ്കൂളിലെത്തിയതുമായി ബന്ധപ്പെട്ട് തര്ക്കമുണ്ടായതില് എറണാകുളം വിദ്യാഭ്യാസ ഉപഡയറക്ടര് നല്കിയ റിപ്പോര്ട്ട് സത്യവിരുദ്ധമാണെന്ന് പള്ളുരുത്തി സെന്റ് റീത്താസ് സ്കൂള് അധികൃതര് വ്യക്തമാക്കി. എട്ടാം ക്ലാസ് വിദ്യാര്ഥിനിയെ ക്ലാസില് പ്രവേശിപ്പിക്കാന് അനുവദിച്ചില്ലെന്ന റിപ്പോര്ട്ട് യാഥാര്ഥ്യവിരുദ്ധമാണെന്നും ഇക്കാര്യം വ്യക്തമാക്കി സര്ക്കാരിന് രേഖാമൂലം മറുപടി നല്കിയെന്നും സ്കൂള് പ്രിന്സിപ്പല് സിസ്റ്റര് ഹെലീന പറഞ്ഞു.
കുട്ടിയെ ശിരോവസ്ത്രം ധരിച്ചു എന്നതിന്റെ പേരില് പുറത്തുനിര്ത്താനുള്ള തീരുമാനം ചട്ടവിരുദ്ധമാണെന്ന റിപ്പോര്ട്ടാണ് വിദ്യാഭ്യാസ ഉപഡയറക്ടര് നല്കിയിരിക്കുന്നത്. ഇതിന്റെ പശ്ചാത്തലത്തില്, മാനേജ്മെന്റിന്റെ ഭാഗം കേള്ക്കാനായി വിശദീകരണം ആവശ്യപ്പെട്ടിട്ടുണ്ടെന്ന് വിദ്യാഭ്യാസ മന്ത്രി വി. ശിവന്കുട്ടി വാര്ത്താസമ്മേളനത്തില് അറിയിച്ചു.
സ്കൂളിന് രാവിലെ ഒന്പതേകാലോടെയാണ് ഇമെയില് വഴി നോട്ടിസ് ലഭിച്ചതെന്നും 11 മണിക്കുമുമ്പ് തന്നെ മറുപടി നല്കിയെന്നും പ്രിന്സിപ്പല് വ്യക്തമാക്കി. ഡിഡിഇ സ്കൂളില് എത്തിയപ്പോള് എല്ലാ തെളിവുകളും സമര്പ്പിച്ചതായും, എങ്കിലും സത്യവിരുദ്ധമായ റിപ്പോര്ട്ടാണ് നല്കിയതെന്നും അവര് ആരോപിച്ചു.
സ്കൂളിലെ യൂണിഫോം നിശ്ചയിക്കാന് സ്കൂള് അധികൃതര്ക്കാണ് അധികാരമെന്ന് 2018ലെ കോടതി വിധിയിലൂടെ വ്യക്തമാക്കിയിട്ടുണ്ടെന്ന് പ്രിന്സിപ്പല് ഓര്മ്മപ്പെടുത്തി. “എല്ലാ കുട്ടികളും ഞങ്ങള്ക്കു ഒരുപോലെയാണ്. വിദ്യാര്ഥിനിയുടെ മാതാപിതാക്കളുമായി സംസാരിക്കും,” എന്നും അവര് പറഞ്ഞു.
സ്കൂള് മാനേജ്മെന്റ് നിശ്ചയിച്ച യൂണിഫോം ധരിക്കുന്നതില് വിരോധമില്ലെന്ന് വിദ്യാര്ഥിനിയുടെ രക്ഷകര്ത്താവ് ഉറപ്പുനല്കിയതായി ഹൈബി ഈഡന് എംപി വ്യക്തമാക്കി. ഇതിനെ തുടര്ന്ന് ഇക്കാര്യത്തില് സമവായം സാധ്യമായാല് നല്ലതാണെന്ന് വിദ്യാഭ്യാസ മന്ത്രി വി. ശിവന്കുട്ടി അഭിപ്രായപ്പെട്ടു.
