വെള്ളക്കരത്തില്‍ വന്‍ ഇളവു പ്രഖ്യാപിച്ച് ഡല്‍ഹി സര്‍ക്കാര്‍, വാട്ടര്‍ ബില്‍ ലേറ്റ് പേയ്‌മെന്‌റ് സര്‍ചാര്‍ജുകള്‍ എഴുതിത്തള്ളി

ന്യൂദല്‍ഹി: അടുത്ത വര്‍ഷം ജനുവരി 31 വരെ ഗാര്‍ഹിക ഉപഭോഗത്തിന് ഈടാക്കിയിരുന്ന വാട്ടര്‍ ബില്‍ ലേറ്റ് പേയ്‌മെന്‌റ് സര്‍ചാര്‍ജുകള്‍ പൂര്‍ണ്ണമായും എഴുതിത്തള്ളുമെന്ന് മുഖ്യമന്ത്രി രേഖ ഗുപ്ത പ്രഖ്യാപിച്ചു.
ജനുവരി 31 മുതല്‍ 2026 മാര്‍ച്ച് 31 വരെ ഗാര്‍ഹിക ഉപഭോക്താക്കള്‍ക്ക് വൈകിയുള്ള പേയ്‌മെന്റ് സര്‍ചാര്‍ജില്‍ 70 ശതമാനം ഇളവും ലഭിക്കും.
അനധികൃത ജല കണക്ഷനുകള്‍ നിയമപരമായ കണക്ഷനുകളാക്കി മാറ്റുന്നതിനുള്ള ഫീസും പിഴയും ഗാര്‍ഹിക വിഭാഗത്തില്‍ നിലവിലെ 25,000 രൂപയില്‍ നിന്ന് 1,000 രൂപയായി കുറയ്‌ക്കാനും ഗാര്‍ഹികമല്ലാത്ത വിഭാഗത്തില്‍ 61,000 രൂപയില്‍ നിന്ന് 5,000 രൂപയായി കുറയ്‌ക്കാനും സര്‍ക്കാര്‍ തീരുമാനിച്ചിട്ടുണ്ടെന്ന് രേഖ ഗുപ്ത പറഞ്ഞു.
ഗാര്‍ഹിക, സര്‍ക്കാര്‍, വാണിജ്യ വിഭാഗങ്ങളിലെ എല്ലാ വാട്ടര്‍ ബില്ലുകളും ഉള്‍പ്പെടെ ഡല്‍ഹി ജലബോര്‍ഡ് പിരിച്ചെടുക്കേണ്ട ആകെ കുടിശ്ശിക തുക 87,589 കോടി രൂപയാണ്. ഇതില്‍ പ്രിന്‍സിപ്പല്‍ തുക 7,125 കോടി രൂപയും എല്‍പിഎസ്സി ചാര്‍ജ് 80,463 കോടി രൂപയുമാണ്, ഇത് മൊത്തം ബില്ലിന്റെ 91 ശതമാനമാണ്.