ന്യൂദല്ഹി: ദേശീയപാത 66 ന്റെ ഉദ്ഘാടനം ജനുവരിയില്. കേന്ദ്ര ഉപരിതല ഗതാഗതവകുപ്പ് മന്ത്രി നിതിന് ഗഡ്കരി ഇക്കാര്യം അറിയിച്ചതായി സംസ്ഥാന പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ് പറഞ്ഞു. ദേശീയപാത 66 ഉള്പ്പെടെ കേരളത്തില് നടക്കുന്ന പ്രവൃത്തികളുടെ നിര്മാണ പുരോഗതി ഇന്നലെ നിതിന് ഗഡ്കരി വിലയിരുത്തി. മുഖ്യമന്ത്രി പിണറായി വിജയനും പി.എ. മുഹമ്മദ് റിയാസും എന്എച്ച്എഐ ഉദ്യോഗസ്ഥരും യോഗത്തില് പങ്കെടുത്തു.
എന്എച്ച് 66 ന്റെ നിര്മാണ പുരോഗതി വിലയിരുത്താനും നടപടികള് വേഗത്തിലാക്കുന്നത് സംബന്ധിച്ച് ചര്ച്ച ചെയ്യാനും ഈ മാസം യോഗം വിളിക്കുമെന്ന് ഗഡ്കരി അറിയിച്ചതായും റിയാസ് വാര്ത്താസമ്മേളനത്തില് പറഞ്ഞു. 16 റീച്ചുകളുടെയും കരാറുകാര്, എന്എച്ച്എഐ ഉദ്യോഗസ്ഥര്, ചീഫ് സെക്രട്ടറി തുടങ്ങിയവര് യോഗത്തില് പങ്കെടുക്കും. ഡിസംബറില് തന്നെ എന്എച്ച് 66 ന്റെ മുഴുവന് റീച്ചുകളും പൂര്ത്തിയാക്കാന് ശ്രമിക്കുമെന്ന് കേന്ദ്രമന്ത്രി ഉറപ്പുനല്കിയിട്ടുണ്ട്. സ്ഥലം ഏറ്റെടുപ്പിന്റെ ബാക്കി തുക ഏകദേശം 237 കോടി രൂപ എഴുതിത്തളളുമെന്ന് കേന്ദ്രമന്ത്രി അറിയിച്ചു. പാലക്കാട് – കോഴിക്കോട് ഗ്രീന്ഫീല്ഡ് ഹൈവേ, തിരുവനന്തപുരം ഔട്ടര് റിങ് റോഡ്, എറണാകുളം ബൈപ്പാസ് എന്നിവയുടെ പ്രവൃത്തി ഉദ്ഘാടനം ജനുവരിയില് നടത്തുമെന്നും മുഹമ്മദ് റിയാസ് പറഞ്ഞു.
കേന്ദ്ര ടൂറിസം മന്ത്രി ഗജേന്ദ്ര സിങ് ഷെഖാവത്തുമായും മുഹമ്മദ് റിയാസ് കൂടിക്കാഴ്ച നടത്തി. 374 കോടി രൂപയുടെ ആറ് പദ്ധതികള് ഇതിനകം കേന്ദ്രം അനുവദിച്ചിട്ടുണ്ട്. 700 കോടി രൂപയുടെ വിവിധ പദ്ധതികളുടെ പ്രൊപ്പോസലുകളും മന്ത്രിക്ക് സമര്പ്പിച്ചു. കേരളം സമര്പ്പിച്ച പദ്ധതികളോട് കേന്ദ്രമന്ത്രി അനുകൂല നിലപാടാണ് സ്വീകരിച്ചതെന്ന് മന്ത്രി മുഹമ്മദ് റിയാസ് പറഞ്ഞു. വകുപ്പ് സെക്രട്ടറി ബിജുവും വാര്ത്താസമ്മേളനത്തില് പങ്കെടുത്തു.
