പത്തനംതിട്ട:: ശബരിമല സമരകാലത്ത് സന്ദീപ് വാര്യര്‍ പുതപ്പിനടിയിലായിരുന്നുവെന്ന് പത്തനം തിട്ട ബിജെപി ജില്ല സെക്രട്ടറി നിതിന്‍ ശിവ. കഴിഞ്ഞ ശബരിമല സമരകാലത്ത് സന്ദീപ് വാര്യര്‍ പുതപ്പിനടിയില്‍ മൂടിപ്പുതച്ച് കിടന്ന് ഉറങ്ങുകയായിരുന്നുവെന്നും നിതിന്‍ ശിവ പറഞ്ഞു.
ഇപ്പോള്‍ ശബരിമലയില്‍ സന്ദീപ് വാര്യര്‍ നടത്തിയത് കോണ്‍ഗ്രസിന്റെ ആഭാസസമരമായിരുന്നുവെന്നും നിതിന്‍ ശിവ ആരോപിച്ചു. സന്ദീപ് വാര്യര്‍ തേങ്ങയുടച്ചത് പത്തനംതിട്ടയില്‍ ദേവസ്വം ഡപ്യൂട്ടി കമ്മീഷണറുടെ ഓഫീസിന്റെ ജനല്‍ച്ചില്ലില്‍ ആണെന്ന് ആരോപണമുണ്ട്. “41 ദിവസം വ്രതമെടുത്താണ് നെയ് തേങ്ങയുമായി വന്നതെന്നാണ് സന്ദീപ് വാര്യര്‍ പറയുന്നത്. പത്ത് ദിവസം പോലും വ്രതമെടുക്കാന്‍ കഴിയാത്തവനാണ് സന്ദീപ് വാര്യര്‍”- നിതിന്‍ ശിവ കുറ്റപ്പെടുത്തി.
സന്ദീപ് വാര്യര്‍ മനപൂര്‍വ്വം പൊലീസുകാരനെ തള്ളിമാറ്റുന്നതിന്റെ വീഡിയോ വ്യാപകമായി സമൂഹമാധ്യമങ്ങളില്‍ പ്രചരിക്കപ്പെടുന്നു. പത്തനം തിട്ട ശാസ്താ ക്ഷേത്രത്തില്‍ പൊലീസ് ബാരിക്കേഡ് വെച്ച് മാര്‍ച്ച് തടഞ്ഞെങ്കിലും തള്ളിമാറ്റി ദേവസ്വം ഓഫീസിലേക്ക് തേങ്ങയുടച്ചതാണ് സംഘര്‍ഷത്തിന് കാരണമായത്. സന്ദീപ് വാര്യര്‍ പ്രതിഷേധ സമരം ഉദ്ഘാടനം ചെയ്ത ശേഷമാണ് പൊലീസ് ബാരിക്കേഡ് തകര്‍ത്ത് സമരക്കാര്‍ തള്ളിക്കയറിയത്.
പൊലീസിന്റെ കൃത്യനിര്‍വ്വഹണം തടസ്സപ്പെടുത്തി, ഡപ്യൂട്ടി കമ്മീഷണര്‍ ഓഫീസിലേക്ക് പോകുന്ന വഴിയില്‍ സ്ഥാപിച്ചിരുന്ന ബാരിക്കേഡും കെട്ടാന്‍ ഉപയോഗിച്ച കയറും നശിപ്പിച്ചു, പൊലീസ് ജീപ്പിന്റെ ബോണറ്റിലും വയര്‍ലെസ് ആന്‍റിനയ്‌ക്കും കേടുപാടുണ്ടാക്കി..തുടങ്ങി ഒട്ടേറെ കുറ്റങ്ങള്‍ പൊലീസ് സമരക്കാര്‍ക്ക് മേല്‍ ചുമത്തിയിട്ടുണ്ട്. പൊലീസ് തന്നെ ലാത്തികൊണ്ട് കുത്തി എന്നാണ് സന്ദീപ് വാര്യര്‍ പരാതിപ്പെടുന്നത്.
