ന്യൂദൽഹി : രാജ്യത്ത് ആഗോള ടൂറിസം കേന്ദ്രത്തിന്റെ തലപ്പത്ത് വാരണാസി. ഒരുകാലത്ത് രാജ്യത്തിന്റെ ആത്മീയ തലസ്ഥാനമായി മാത്രം അറിയപ്പെട്ടിരുന്ന വാരണാസി, ഗോവ, ഷിംല തുടങ്ങിയ സ്ഥലങ്ങളെ മറികടന്നാണ് ആഗോള ടൂറിസം കേന്ദ്രമായി മാറിയിരിക്കുന്നത് .
2024-ൽ വിനോദസഞ്ചാരികളുടെ വരവിൽ അഭൂതപൂർവമായ വർധനവുണ്ടായതായി ഔദ്യോഗിക കണക്കുകൾ വെളിപ്പെടുത്തുന്നു. 18.7 ശതമാനം വർധനവാണ് സഞ്ചാരികളുടെ എണ്ണത്തിൽ ഉണ്ടായിരിക്കുന്നത് . ഉത്തർപ്രദേശ് ടൂറിസം വകുപ്പിന്റെയും ടൂറിസം മന്ത്രാലയത്തിന്റെയും കണക്കുകൾ പ്രകാരം, 2024-ൽ 11 കോടിയിലധികം സന്ദർശകർ വാരണാസിയിൽ എത്തി.
2023-ൽ 9.3 കോടി സഞ്ചാരികളാണ് എത്തിയത് . വിദേശ വിനോദസഞ്ചാരികളുടെ വരവിലെ ക്രമാതീതമായ വർദ്ധനവാണ് ഈ വളർച്ചയെ ശ്രദ്ധേയമാക്കുന്നത്. 2021 മുതൽ ഇത് 120 മടങ്ങ് വർദ്ധിച്ചു. 2021-ൽ 2,566 വിദേശ വിനോദസഞ്ചാരികൾ മാത്രമാണ് നഗരം സന്ദർശിച്ചത്. 2022-ൽ ഈ സംഖ്യ 83,741 ആയി, 2023-ൽ 2,01,904 ആയി, 2024-ൽ 3,09,932 ആയി ഉയർന്നു. 2025 ജൂൺ ആയപ്പോഴേക്കും നഗരം 1.88 ലക്ഷം വിദേശ സന്ദർശകരെ സ്വാഗതം ചെയ്തു.”വാരണാസിയെ ഒരു ആഗോള ആത്മീയ-സാംസ്കാരിക കേന്ദ്രമായി അവതരിപ്പിക്കാനുള്ള സർക്കാരിന്റെ നിരന്തരമായ ശ്രമം ഫലം കണ്ടു,”എന്നാണ് ഉത്തർപ്രദേശ് ടൂറിസം മന്ത്രി ജയ്വീർ സിംഗ് പറഞ്ഞത്.
രാമക്ഷേത്രത്തിലെ ചരിത്രപ്രസിദ്ധമായ പ്രാണപ്രതിഷ്ഠയ്‌ക്ക് ശേഷം 2024-ൽ അയോധ്യയിൽ മാത്രം 10 കോടിയിലധികം സന്ദർശകർ എത്തിയതായും മഥുരയും പ്രയാഗ്‌രാജും ഗണ്യമായ കാൽനടയാത്രക്കാർ എത്തിയതായും അദ്ദേഹം കൂട്ടിച്ചേർത്തു.
