രാഷ്‌ട്രത്തിന്റെ അതിര്‍ത്തി കാക്കുകയും, ജനങ്ങള്‍ക്ക് സുരക്ഷയൊരുക്കുകയും, അതിക്രമിച്ചു കയറുന്ന ശത്രു സൈന്യത്തെ തുരത്തിയോടിക്കുകയും ചെയ്യുന്നതില്‍ ഭാരതത്തിന്റെ സൈനികര്‍ പ്രകടിപ്പിക്കുന്ന ആത്മാര്‍ത്ഥതയും, അവര്‍ കാഴ്ചവയ്‌ക്കുന്ന ധീരതയും ലോക പ്രസിദ്ധമാണ്. ചൈനയുമായുള്ള യുദ്ധത്തില്‍ അന്നത്തെ രാഷ്‌ട്രീയ-ഭരണ നേതൃത്വത്തിന്റെ അനാസ്ഥ കൊണ്ട് സംഭവിച്ച തിരിച്ചടി ഒഴിച്ചുനിര്‍ത്തിയാല്‍ ഐതിഹാസികമായ പോരാട്ടമാണ് യുദ്ധമുഖങ്ങളില്‍ ഭാരതത്തിന്റെ സൈനികര്‍ കാഴ്ച വച്ചിട്ടുള്ളത്. ഭാരതത്തിന്റെ അതിര്‍ത്തി കടന്നെത്തുന്ന ശത്രുക്കളെ മാത്രമല്ല, രാഷ്‌ട്രത്തിന്റെ ഐക്യത്തെയും അഖണ്ഡതയെയും വെല്ലുവിളിക്കുന്നവരെ അതിര്‍ത്തിക്ക് അപ്പുറത്തു പോയി നേരിടാനും നമ്മുടെ സൈനികര്‍ മികവു കാണിക്കുന്നു. പുല്‍വാമയില്‍ ജയ്‌ഷെ മുഹമ്മദ് ഭീകരര്‍ സൈനികരെ ആക്രമിച്ച് കൊലപ്പെടുത്തിയതിനും, പഹല്‍ഗാമില്‍ ജിഹാദി ഭീകരര്‍ നിരപരാധികളെ കൂട്ടക്കൊല ചെയ്തതിനും യഥാക്രമം പാക്കധീന കശ്മീരിലും പാകിസ്ഥാനില്‍ കടന്നും ഭാരത സൈനികര്‍ നടത്തിയ പ്രഹരം ദേശസ്‌നേഹത്തിന്റെയും ധീരതയുടെയും പുതിയ ചരിത്രം രചിക്കുകയുണ്ടായി.
ശത്രുക്കളെ തുരത്താന്‍ മാത്രമല്ല, മിത്രങ്ങളെ ചേര്‍ത്തുപിടിക്കാനും നമ്മുടെ സൈനികര്‍ക്ക് അറിയാം. പ്രളയവും ഭൂകമ്പവും പോലുള്ള പ്രകൃതിദുരന്തങ്ങളില്‍ ജീവന്‍ പണയം വച്ച് സൈനികര്‍ നടത്തിയ രക്ഷാപ്രവര്‍ത്തനങ്ങള്‍ക്ക് കേരളത്തിലടക്കം നിരവധി ഉദാഹരണങ്ങളുണ്ടല്ലോ. എന്നാല്‍ അത്യപൂര്‍വ്വവും ഹൃദയത്തില്‍ തൊടുന്നതുമായ ഒരു പ്രവൃത്തി ഇക്കഴിഞ്ഞ ദിവസം സൈനികരുടെ ഭാഗത്തുനിന്ന് ഉണ്ടായിരിക്കുന്നു. രാഷ്‌ട്രത്തിനു വേണ്ടി ജീവന്‍ ത്യജിച്ച തങ്ങളിലൊരാളുടെ സഹോദരിയെ വിവാഹമണ്ഡപത്തിലേക്ക് ആനയിക്കുന്ന സൈനികരുടെ ചിത്രം അവിസ്മരണീയമാണ്. അരുണാചലില്‍ നടന്ന ഏറ്റുമുട്ടലില്‍ ബലിദാനിയായ ആശിഷ് എന്ന സൈനികന്റെ സ്വപ്‌നമായിരുന്നു സ്വന്തം സഹോദരി ആരാധനയുടെ വിവാഹം. ഈ സ്വപ്നമാണ് സഹോദരന്റെ സ്ഥാനത്തുനിന്ന് സൈനികര്‍ നടത്തിക്കൊടുത്തത്. ഹിമാചല്‍ പ്രദേശിലെ സിര്‍മര്‍ ജില്ലയിലാണ് ആശിഷിന്റെ വീട്. അവിടെയായിരുന്നു വിവാഹം. ആരാധനയെ വിവാഹ മണ്ഡപത്തിലേക്ക് ആനയിച്ചതുള്‍പ്പെടെ എല്ലാ ചടങ്ങുകളിലും സൈനികര്‍ പങ്കുകൊണ്ടു. ഭര്‍തൃ വീട്ടിലേക്കുള്ള ആരാധനയുടെ യാത്രയെ അനുഗമിക്കുക മാത്രമല്ല, ഈ സഹോദരിക്കായി മൂന്ന് ലക്ഷം രൂപയുടെ സ്ഥിരനിക്ഷേപവും നല്‍കിയാണ് സൈനികര്‍ മടങ്ങിയത്.
സൈനികര്‍ക്കിടയിലെ സാഹോദര്യത്തിന്റെ ദൃഢതയാണ് ഇത് കാണിക്കുന്നത്. അരുണാചലില്‍ നിന്ന് ഈ വിവാഹം നടത്താന്‍ ഹിമാചലില്‍ എത്തിയ സൈനികര്‍ക്കൊപ്പം പ്രദേശത്തെ വിമുക്തഭടന്മാരും ചേര്‍ന്നു എന്നത് സാഹോദര്യത്തിന്റെ മാറ്റുകൂട്ടുന്നു. പലപ്പോഴും യുദ്ധകാലത്ത് മാത്രമാണ് നാം സൈനികരെ ഓര്‍ക്കുന്നത്. നാടും വീടും വിട്ട്, പ്രിയപ്പെട്ടവരില്‍ നിന്ന് വളരെയകന്ന് ഏതു സമയത്തും ജീവന്‍ ത്യജിക്കേണ്ടി വരുമെന്നു കരുതി കഴിയുന്നവരുടെ വ്യഥകള്‍ പലരും തിരിച്ചറിയാറില്ല. യുദ്ധത്തിലും ശത്രുക്കളുടെ മറ്റുതരത്തിലുള്ള ആക്രമണങ്ങളിലും ജീവനും ജീവിതവും നഷ്ടപ്പെടുമ്പോള്‍ മാത്രമാണ് ഇവരെ മറ്റുള്ളവര്‍ തിരിച്ചറിയുക. ഒരു ജനതയുടെ ഒന്നാകെയുള്ള ജീവനും സ്വത്തിനും സമാധാന ജീവിതത്തിനും കാവല്‍ നില്‍ക്കുന്നവരാണ് സൈനികര്‍. അവരുടെ കുടുംബത്തിന് കാവലാളാവാന്‍ നമുക്ക് ബാധ്യതയുണ്ട്. സ്വ സഹോദരന്റെ അഭാവത്തില്‍ ആരാധനയുടെ വിവാഹം നടത്തിക്കൊടുത്ത സൈനികര്‍ ഈ ഉത്തരവാദിത്വം ഓരോ പൗരനെയും ഓര്‍മിപ്പിക്കുന്നു.
