കാസര്‍ഗോഡ്: കുമ്പള ഹയര്‍ സെക്കന്‍ഡറി സ്‌കൂള്‍ കലോത്സവത്തില്‍ പലസ്തീന്‍ ഐക്യദാര്‍ഢ്യം പ്രകടിപ്പിച്ച് മൈം അവതരിപ്പിച്ചപ്പോള്‍ കര്‍ട്ടന്‍ താഴ്‌ത്തിയതും പരിപാടി നിര്‍ത്തി വയ്‌പിച്ചതും വിവാദമായി. സംഭവം അടിയന്തരമായി അന്വേഷിച്ച് റിപ്പോര്‍ട്ട് നല്‍കാന്‍ പൊതുവിദ്യാഭ്യാസ ഡയറക്ടര്‍ക്ക് നിര്‍ദേശം നല്‍കിയെന്ന് മന്ത്രി വി. ശിവന്‍കുട്ടി പറഞ്ഞു.
വിദ്യാര്‍ഥികള്‍ക്ക് ഇതേ വേദിയില്‍ മൈം അവതരിപ്പിക്കാന്‍ അവസരം നല്‍കുമെന്ന് മന്ത്രി പറഞ്ഞു.പലസ്തീനില്‍ ഇസ്രയേലിന്റെ വംശഹത്യയ്‌ക്ക് എതിരെ എന്നും നിലപാടെടുത്ത ജനവിഭാഗമാണ് കേരളം. പലസ്തീനില്‍ വേട്ടയാടപ്പെടുന്ന കുഞ്ഞുങ്ങള്‍ക്കൊപ്പമാണ് സംസ്ഥാനം. പലസ്തീന്‍ വിഷയത്തില്‍ അവതരിപ്പിച്ച മൈം തടയാന്‍ ആര്‍ക്കും അധികാരമില്ലെന്നും മന്ത്രി പറഞ്ഞു.
മൈം വേദിയില്‍ അവതരിപ്പിക്കെ രണ്ട് അധ്യാപകര്‍ ഇടപെട്ട് കര്‍ട്ടന്‍ താഴ്‌ത്തിയെന്നാണ് ആരോപണം.ഒരു ദുരുദ്ദേശവും സംഭവത്തില്‍ ഇല്ലെന്ന് സ്‌കൂള്‍ പ്രധാനാധ്യാപിക പറഞ്ഞു.
