ന്യൂദൽഹി : മോട്ടോര്‍ സൈക്കിളിന് 100 കിലോ ഭാരവും കാറിന് മൂവായിരം കിലോ ഭാരവും ഉണ്ടാകാൻ വിചിത്രമായ കാരണം കണ്ടെത്തിയ ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയെ പരിഹസിച്ച് ബിജെപി മീഡിയ സെല്‍ മേധാവി അമിത് മാളവ്യ .
കൊളംബിയയിലെ ഇഐഎ സര്‍വകലാശാലയിലെ വിദ്യാര്‍ഥികളുമായുള്ള ആശയവിനിമയത്തിനിടെയാണ് രാഹുല്‍ ഇങ്ങനൊരു ചോദ്യമുന്നയിച്ചതും അതിന് സ്വന്തംനിലയ്‌ക്ക് വിശദീകരണം നല്‍കിയതും.
അപകടമുണ്ടാകുമ്പോള്‍ കാറിന്റെ എന്‍ജിന്‍ നിങ്ങളെ കൊല്ലും. എന്നാല്‍ മോട്ടോര്‍ സൈക്കിളിന് ഭാരക്കുറവാണ്. കാരണം, അപകടമുണ്ടാകുമ്പോള്‍ അതിന്റെ എന്‍ജിന്‍ തെറിച്ചുപോകും, രാഹുല്‍ പറഞ്ഞു. ഒരു മോട്ടോര്‍ സൈക്കിളില്‍, അപകടമുണ്ടാകുമ്പോള്‍ എന്‍ജിന്‍ നിങ്ങളില്‍നിന്ന് വേര്‍പെട്ടുപോകും. അതുകൊണ്ട് എന്‍ജിന്‍ നിങ്ങളില്‍ പരിക്കേല്‍പിക്കില്ല. ഒരു കാറില്‍, അപകടമുണ്ടാകുമ്പോള്‍ എന്‍ജിന്‍ കാറിനുള്ളിലേക്ക് വരും. അതിനാല്‍ എന്‍ജിന്‍ നിങ്ങളെ കൊലപ്പെടുത്താത്ത വിധത്തിലാണ് കാര്‍ രൂപകല്‍പന ചെയ്യപ്പെട്ടിട്ടുള്ളത്, എന്നാണ് രാഹുൽ നൽകിയ വിശദീകരണം .
എന്നാല്‍ രാഹുലിന്റെ വിശദീകരണം എന്താണെന്ന് ആര്‍ക്കെങ്കിലും മനസ്സിലായെങ്കില്‍ അത് പറഞ്ഞുതരണമെന്നുമുള്ള അഭ്യര്‍ഥനയുമായി ബിജെപി മീഡിയ സെല്‍ മേധാവി അമിത് മാളവ്യ രംഗത്തെത്തി .
ഇതുവരെയും ഇത്രയധികം അസംബന്ധം ഒറ്റയടിക്ക് താന്‍ കേട്ടിട്ടില്ലെന്ന് ബിജെപി നേതാവ് അമിത് മാളവ്യ പറഞ്ഞു. രാഹുല്‍ എന്താണ് പറയാന്‍ ശ്രമിക്കുന്നതെന്ന് ആര്‍ക്കെങ്കിലും മനസ്സിലാക്കാന്‍ കഴിഞ്ഞാല്‍ അവര്‍ എന്നെ അത് ബോധ്യപ്പെടുത്തിയാല്‍ ഞാന്‍ വളരെ സന്തുഷ്ടനായിരിക്കും. എന്നാല്‍ നിങ്ങള്‍ക്കും എന്നെപ്പോലെ ഫലിതമായി അത് അനുഭവപ്പെട്ടാല്‍, ഉറപ്പിച്ചോളൂ നിങ്ങള്‍ ഒറ്റയ്‌ക്കല്ല, അമിത് മാളവ്യ കുറിച്ചു.
