ബോഗോട്ട: കൊളംബിയയിലെ ഇഐഎ സര്‍വ്വകലാശാലയിലെ എഞ്ചിനീയറിംഗ് വിദ്യാര്‍ത്ഥികളെ അഭിസംബോധന ചെയ്ത രാഹുല്‍ ഗാന്ധി നടത്തിയ പ്രസംഗത്തില്‍ ചൈനയ്‌ക്ക് അഭിനന്ദനം. ഇന്ത്യയ്‌ക്കുനേരെ പതിവുശൈലിയിലുള്ള അധിക്ഷേപവും രാഹുല്‍ ഗാന്ധി നടത്തി.
ചൈന വളരെ കേന്ദ്രീകൃതം ഏകീകൃതവുമാണെന്നും എന്നാല്‍ ഇന്ത്യ വിവിധ ഭാഷകളും മതങ്ങളും പ്രാദേശിക സംസ്കാരങ്ങളും നിറഞ്ഞ ജനാധിപത്യരാഷ്‌ട്രമാണെന്നും രാഹുല്‍ ഗാന്ധി വിശദീകരിച്ചു. എന്നാല്‍ ഏകാധിപത്യം നിലനില്‍ക്കുന്ന ചൈനയെ വിമര്‍ശിക്കാന്‍ രാഹുല്‍ തയ്യാറായില്ല. ചൈനയില്‍ ഇസ്ലാം മതക്കാരായ ഉയ്ഗുര്‍ മുസ്ലിം വിഭാഗത്തെ വംശഹത്യ നടത്തുന്ന ചൈനീസ് സര്‍ക്കാരിനെതിരെ മിണ്ടാന്‍ പോലും രാഹുല്‍ ഗാന്ധി തയ്യാറായില്ല. അതേ സമയം ഇന്ത്യയുടെ ജനാധിപത്യം അപകടത്തിലാണെന്ന് പറയാനായിരുന്നു രാഹുലിന് ഉത്സാഹം.
യുഎസും ചൈനയുമായി കിടമത്സരം നടക്കുകയാണെന്നും ഇതുവരെയുള്ള മത്സരത്തില്‍ ചൈനയാണ് വിജയിച്ചിരിക്കുന്നത് എന്നാണ് രാഹുല്‍ ഗാന്ധി നടത്തിയ മറ്റൊരു ചൈനാസ്തുതി. “പണ്ട് ആവിയന്ത്രങ്ങളും കല്‍ക്കരിയും ഉപയോഗിച്ചുള്ള വ്യവസായരംഗം ബ്രിട്ടന്‍ ഭരിച്ചു. പിന്നീട് പെട്രോളില്‍ ഓടുന്ന വാഹനങ്ങളും ഇന്‍റേണല്‍ കമ്പസ്റ്റിന്‍ എഞ്ചിനുകളും വന്നതോടെ അമേരിക്ക ബ്രിട്ടനെ പിന്നിലാക്കി. ഇപ്പോള്‍ പെട്രോളിന് പകരം ഇലക്ട്രിക് ബാറ്ററികള്‍ എത്തിയിരിക്കുന്നു. യുഎസും ചൈനയും തമ്മിലാണ് ഇപ്പോള്‍ മത്സരം. ഇതില്‍ ഇതുവരെ ചൈന വിജയിച്ചിരിക്കുന്നു.” – ഇങ്ങിനെ പോകുന്നു രാഹുലിന്റെ ചൈനാസ്തുതി.
ഇനി ഇന്ത്യയെ വീണ്ടും രാഹുല്‍ ഗാന്ധി കുത്തുന്നുണ്ട്. “ഇന്ത്യ ചൈനയുടെ അയല്‍ രാജ്യമാണെങ്കിലും യുഎസിന്റെ പങ്കാളിയാണ്.”- ഇതായിരുന്നു രാഹുലിന്റെ ഇന്ത്യയ്‌ക്കെതിരായ പരോക്ഷവിമര്‍ശനം.
