തിരുവനന്തപുരം: ഗാന്ധിജയന്തിയുടെ മറവില്‍ വിജയദശമി ആഘോഷങ്ങളെ തകര്‍ക്കാന്‍ പിണറായി സര്‍ക്കാരിന്റെ ഗൂഢശ്രമം. വിജയദശമി ദിനത്തില്‍ വിദ്യാര്‍ത്ഥികളെയെല്ലാം സ്‌കൂളില്‍ എത്തിക്കാനായി വിവാദ നിര്‍ദേശവുമായി പൊതുവിദ്യാഭ്യാസ ഡയറക്ടര്‍. മുഖ്യമന്ത്രി പിണറായി വിജയന്റെ ഗാന്ധിജയന്തി സന്ദേശം വിദ്യാര്‍ത്ഥികളില്‍ എത്തിക്കാനാണ് അടിയന്തര നിര്‍ദേശം പുറത്തിറക്കിയത്.
ഗാന്ധിജയന്തി ദിനാചരണത്തോടനുബന്ധിച്ച് ഒക്ടോബര്‍ 2ന് പ്രധാന അധ്യാപകര്‍ വരെയുള്ള വിദ്യാഭ്യാസ ഓഫീസര്‍മാര്‍ അവരുടെ അധികാരപരിധിയിലുള്ള സ്‌കൂളുകളില്‍ സന്ദേശങ്ങളുടെ വിതരണം ഉറപ്പാക്കുകയും ഓരോ വിദ്യാര്‍ത്ഥിക്കും ലഭിച്ചു എന്ന് ഉറപ്പാക്കുകയും വേണമെന്നാണ് ഇന്നലെ വിദ്യാഭ്യാസ ഡയറക്ടറുടെ സര്‍ക്കുലറില്‍ നല്‍കിയിരിക്കുന്ന നിര്‍ദ്ദേശം. വിദ്യാഭ്യാസ ഉപഡയറക്ടര്‍മാരും റിജിയണല്‍ ഡെ.
ഡയറക്ടര്‍മാരും അസി. ഡയറക്ടര്‍മാരും ആവശ്യമായ നടപടികള്‍ സ്വീകരിക്കണമെന്നും നിര്‍ദേശിച്ചിട്ടുണ്ട്. മുഖ്യമന്ത്രിയുടെ സന്ദേശം സ്‌കൂളുകളില്‍ എത്തിക്കാന്‍ എസ്എസ്‌കെ, ഡയറ്റ്, വിദ്യാകിരണം എന്നിവയുടെ വാഹന സൗകര്യം പ്രയോജനപ്പെടുത്തണം. സന്ദേശം കുട്ടികളില്‍ എത്തിക്കുന്ന കാര്യം ഗൗരവമായി കാണണമെന്നും നിര്‍ദേശിച്ചിട്ടുണ്ട്.
വിദ്യാഭ്യാസ ഡയറക്ടറുടെ നിര്‍ദേശം നടപ്പാക്കണമെങ്കില്‍ വിജയദശമി ദിവസം എല്ലാ വിദ്യാര്‍ത്ഥികളെയും സ്‌കൂളുകളില്‍ എത്തിക്കണം. അന്നേദിവസം പൂജവെപ്പും ആദ്യക്ഷരം കുറിക്കലും വിദ്യാപൂജയുമൊക്കെയായി ക്ഷേത്രങ്ങളില്‍ ആചാര അനുഷ്ഠാനങ്ങള്‍ ഉണ്ട്. വിദ്യാര്‍ത്ഥികള്‍ സ്‌കൂളുകളില്‍ എത്തണമെന്ന് നിര്‍ദേശിച്ചാല്‍ വിദ്യാര്‍ത്ഥികള്‍ക്ക് വിജയദശമി ആഘോഷത്തിലും ആചാര അനുഷ്ഠാനങ്ങളിലും പങ്കെടുക്കാനാകില്ല. മാത്രമല്ല വീടുകളില്‍ നിന്ന് മാറി പഠിക്കുന്നവരും ജോലി ചെയ്യുന്നവരുടെ കുട്ടികളും ഉള്‍പ്പെടെ സ്വന്തം നാട്ടിലേക്ക് മടങ്ങിപ്പോയിട്ടുണ്ട്.
ക്ഷേത്രങ്ങള്‍ കേന്ദ്രീകരിച്ചുള്ള തീര്‍ത്ഥാടനയാത്രകള്‍ക്കും വിനോദയാത്രകള്‍ക്കും കുടുംബ സമേതം പോയവരുമുണ്ട്. ഇവരെല്ലാം പ്രതിസന്ധിയിലാകും.
ജന്മഭൂമി ഓണ്‍ലൈന്‍