തിരുവനന്തപുരം: ബിജെപി സംസ്ഥാന അദ്ധ്യക്ഷൻ ഡോ. രാജീവ് ചന്ദ്രശേഖറിന്റെ സന്ദേശം ശ്രദ്ധേയമാകുന്നു. തിരിച്ചകളെ അതിജീവിക്കാനും സമുദ്രച്ചുഴിയിൽ പെട്ടവർക്ക് ദീപസ്തംഭമാകാനുമുള്ള ആഹ്വാനവുമാണ് അദ്ദേഹം ഫേസ് ബുക് പോസ്റ്റിലൂടെ നൽകിയിരിക്കുന്നത്. ഫേസ്ബുക്കിൽ അദ്ദേഹം എഴുതുന്നു: ””കഠിനാധ്വാനവും,കൃത്യതയും, ലക്ഷ്യബോധവും ഒപ്പമുണ്ടോ? തിരിച്ചടികളെ നിങ്ങൾക്ക് അതിജീവിക്കാം…ധൈര്യവും ആത്മവിശ്വാസവും കൂട്ടിനുണ്ടാവണം.
സുഖസമൃദ്ധമായ ജീവിത യാത്ര എളുപ്പമാണ്;പക്ഷേ കഠിന വേളകളിൽ നിന്ന് കര കയറുന്നതാണ് ‘ഹീറോയിസം…’
സമയത്തെ വിലമതിച്ച് ബുദ്ധിപൂർവം മാത്രം ഉപയോഗിക്കുക…
തളർച്ചകളാവണം പാഠം…”
ഒരു ക്ലീഷേ ഉപദേശത്തിനപ്പുറത്തേക്ക് സ്വീകരിക്കാൻ ഇതിൽ ഒന്നുമില്ലെന്ന തോന്നലായിരുന്നു,അന്നത്തെ എന്നിലെ ഇരുപതുകാരന്. കാലം പോകെപ്പോകെ ഈ വാക്കുകളിലെ തത്വചിന്തക്കപ്പുറത്തെ പ്രായോഗികതയെ ചേർത്തു പിടിച്ചായിരുന്നു എന്റെ ജീവിതയാത്രകളത്രയും…അതുണ്ടാക്കിയ പരിവർത്തനങ്ങളോട് കടപ്പെട്ടിരിക്കുന്നു എന്റെ ‘വിജയാദ്ധ്യായങ്ങൾ.’
നാല്പത് വർഷങ്ങളുടെ പരിണാമ ദശകൾ താണ്ടിയ എനിക്ക് മുൻപിൽ വ്യത്യസ്തങ്ങളായ ആശയങ്ങളുമായി എത്തുന്ന യുവാക്കളെ ഞാൻ സാകൂതം കേൾക്കാറുണ്ട്; ഭയരഹിതമായി ആത്മവിശ്വാസത്തോടെ, പ്രതിസന്ധികളെ നേരിടാൻ തയ്യാറായി നിൽക്കുന്നവർ. ആ മുഖങ്ങളിൽ പലപ്പോഴും ഞാനെന്റെ യൗവന കാല പ്രതിബിംബം കാണാറുമുണ്ട്.
“നിങ്ങൾക്കുള്ള അറിവും അനുഭവവും ഇനിയുള്ളവരിലേക്ക് കൈമാറാൻ തയ്യാറാവുക; അതാണ് യഥാർത്ഥ മഹത്വം; ജീവിതത്തിന്റെ വിശാലമായ സമുദ്രച്ചുഴിയിൽ പെട്ടവർക്ക് ദീപസ്തംഭമാവുക; അതാണ് നൻമ” – ഒരു ഗുരുസ്ഥാനീയന്റെ വാക്കുകൾ ഞാനിപ്പോഴും മന്ത്രമായി ജപിക്കുന്നു.
നമുക്കിങ്ങനെ സംഗ്രഹിക്കാം:
പരാജയഭീതിയില്ലാതെ മുന്നേറുക; കഠിനാദ്ധ്വാനമാവട്ടെ ലക്ഷ്യത്തിലേക്കുള്ള മാർഗം, ഞാൻ എന്ന സ്വത്വത്തിൽ വിശ്വസിക്കുക, തിരിച്ചടികളെ ഊർജമാക്കി ഗതിവേഗം കൂട്ടുക.”
