ന്യൂദല്ഹി: സ്വയംപര്യാപ്തത സ്വദേശിയിലൂടെ എന്നാവര്ത്തിച്ച് പ്രധാനമന്ത്രി നരേന്ദ്രമോദി. മന് കി ബാത്തിന്റെ 126-ാം പതിപ്പില് രാഷ്ട്രത്തോട് സംവദിക്കവെയാണ് പ്രധാനമന്ത്രി സ്വദേശി ഉല്പന്നങ്ങള്ക്ക് വീണ്ടും ഊന്നല് നല്കിയത്. നാം സ്വയംപര്യാപ്തരാകണം, രാജ്യത്തെ സ്വയംപര്യാപ്തമാക്കണം, അതിലേക്കുള്ള പാത സ്വദേശിയിലൂടെ മാത്രമാണെന്ന് പ്രധാനമന്ത്രി വ്യക്തമാക്കി.
ഒന്നിനുപിറകെ ഒന്നായി ഉത്സവങ്ങളും ആഘോഷ നാളുകളും വരികയാണ്, തദ്ദേശീയ ഉല്പ്പന്നങ്ങള് മാത്രം ഉപയോഗിച്ച് ഇത്തവണ ഉത്സവങ്ങള് ആഘോഷിക്കുമെന്ന് ദൃഢനിശ്ചയം എടുത്താല്, ഉത്സവങ്ങളെ കൂടുതല് സവിശേഷമാക്കാന് കഴിയുമെന്ന് പ്രധാനമന്ത്രി പറഞ്ഞു. ‘വോക്കല് ഫോര് ലോക്കല്’ എന്നത് ഷോപ്പിങ് മന്ത്രമാക്കുക. നമ്മുടെ രാജ്യത്ത് നിര്മ്മിക്കുന്ന ഉല്പന്നങ്ങള് മാത്രമേ നാം വാങ്ങുകയുള്ളൂ എന്ന ദൃഢനിശ്ചയമെടുക്കുക. ഇങ്ങനെ ചെയ്യുമ്പോള്, ഒരു ഉല്പന്നം വാങ്ങുക മാത്രമല്ല, ഒരു കുടുംബത്തിന് പ്രതീക്ഷ നല്കുന്നു, ഒരു കരകൗശല വിദഗ്ധന്റെ കഠിനാധ്വാനത്തെ ബഹുമാനിക്കുന്നു, ഒരു യുവസംരംഭകന്റെ സ്വപ്നങ്ങള്ക്ക് ചിറകുകള് നല്കുന്നു, പ്രധാനമന്ത്രി പറഞ്ഞു.
ഒക്ടോബര് രണ്ടിന് ഗാന്ധി ജയന്തിദിനത്തില് ഏതെങ്കിലും ഒരു ഖാദി ഉല്പ്പന്നം വാങ്ങണം. അത് തദ്ദേശീയമാണെന്ന് അഭിമാനത്തോടെ പ്രഖ്യാപിക്കണം. വോക്കല് ഫോര് ലോക്കല് എന്ന ഹാഷ് ടാഗോടെ സോഷ്യല് മീഡിയയില് പങ്കുവെയ്ക്കണം, പ്രധാനമന്ത്രി ആവശ്യപ്പെട്ടു. ഒക്ടോബര് ഏഴിന് മഹര്ഷി വാല്മീകി ജയന്തിയാണെന്ന് ഓര്മ്മിപ്പിച്ച പ്രധാനമന്ത്രി, അയോധ്യയിലേക്ക് രാംലല്ലയെ ദര്ശിക്കാന് പോകുമ്പോള് മഹര്ഷി വാല്മീകിയുടെയും നിഷാദരാജന്റെയും ക്ഷേത്രങ്ങള് സന്ദര്ശിക്കണമെന്നും അഭ്യര്ത്ഥിച്ചു.
ഉത്സവ അവസരങ്ങളില് ശുചിത്വം വീടിന്റെ നാല് ചുവരുകളില് മാത്രം ഒതുങ്ങരുതെന്നും തെരുവ്, പ്രദേശം, കമ്പോളം, ഗ്രാമം എന്നിങ്ങനെ എല്ലായിടവും ശുചീകരിക്കേണ്ടത് ഉത്തരവാദിത്ത്വമായി മാറണമെന്നും പ്രധാനമന്ത്രി പറഞ്ഞു. ഛഠ്പൂജയെ യുനെസ്കോയുടെ പൈതൃകപട്ടികയില് ഉള്പ്പെടുത്താന് ശ്രമിക്കുന്നതായി പ്രധാനമന്ത്രി അറിയിച്ചു.
നവരാത്രി, ദീപാവലി ആശംസകളും പ്രധാനമന്ത്രി നേര്ന്നു. ഭഗത് സിങിനും ലതാ മങ്കേഷ്കര്ക്കും ശ്രദ്ധാഞ്ജലി അര്പ്പിച്ചാണ് അഭിസംബോധന ആരംഭിച്ചത്. അവസാനത്തില് ഭൂപന് ഹസാരിക, സുബീന് ഗാര്ഗ്, എസ്.എല്. ഭൈരപ്പ എന്നിവര്ക്ക് സ്മരണാഞ്ജലി അര്പ്പിച്ചു.
