കരുനാഗപ്പള്ളി: മാതാ അമൃതാനന്ദമയി ദേവിയുടെ 72-ാം ജന്മദിനം ആഘോഷിക്കാന് ഒരുങ്ങി അമൃതപുരി. ജന്മദിനമായ 27ന് രാവിലെ 5ന് 108 ഗണപതിഹോമങ്ങളോടെ അമൃതപുരിയില് ആഘോഷങ്ങള്ക്ക് തുടക്കമാകും. തുടര്ന്ന് ഗുരുപാദപൂജ, അമ്മയുടെ ജന്മദിനസന്ദേശം, വിശ്വശാന്തി പ്രാര്ത്ഥന, ഭജന, സത്സംഗം എന്നിവ നടക്കും. ലോകത്തിന്റെ നാനാഭാഗങ്ങളില് നിന്നുള്ള പ്രമുഖര് പങ്കെടുക്കുന്ന ചടങ്ങില് നൃത്താര്ച്ചന, സംഗീതാര്ച്ചന എന്നിവയുള്പ്പെടെയുള്ള കലാസാംസ്കാരിക പരിപാടികള് അരങ്ങേറും. അമൃതാനന്ദമയിമഠം ഏര്പ്പെടുത്തിയ അമൃതകീര്ത്തി പുരസ്കാരം വേദിയില് വിതരണം ചെയ്യും.
നിര്ധനരായ യുവതീയുവാക്കളുടെ സമൂഹവിവാഹം, ആശ്രമത്തിലെ പുതിയ പ്രസിദ്ധീകരണങ്ങളുടെ പ്രകാശനം എന്നിവയും നടക്കും. അമ്മയുടെ ജന്മദിനാഘോഷങ്ങളുടെ ഭാഗമായി നിരവധി ജീവകാരുണ്യ പ്രവര്ത്തനങ്ങള്ക്കും ശ്രമദാന പദ്ധതികള്ക്കുമാണ് ആശ്രമം ഇത്തവണ തുടക്കമിട്ടിരിക്കുന്നത്.
ലോക ശുചീകരണ ദിനമായ നാളെ ആഗോളതലത്തില് മെഗാ ശുചീകരണ യജ്ഞം നടത്താന് മാതാ അമൃതാനന്ദമയി മഠം തീരുമാനിച്ചിട്ടുണ്ട്. 300 നിര്ധനര്ക്ക് സൗജന്യ ശസ്ത്രക്രിയ ചെയ്ത് നല്കും. 18 വയസിന് താഴെയുള്ള കുട്ടികള്ക്കായി ഹൃദയ ശസ്ത്രക്രിയാ ക്യാമ്പ് കൊച്ചി അമൃത ആശുപത്രിയില് ആരംഭിച്ചിട്ടുണ്ട്.
‘ഒരു ലോകം, ഒരു ഹൃദയം’ എന്ന വിഷയത്തില് മാതാ അമൃതാനന്ദമയീമഠം സ്കൂള് വിദ്യാര്ത്ഥികള്ക്കായി ഉപന്യാസരചന, ചിത്രരചന, ക്വിസ് മത്സരങ്ങള് എന്നിവ സംഘടിപ്പിക്കും. ആശ്രമത്തിലെ ബ്രഹ്മചാരിണിമാര് നയിക്കുന്ന 108 ഗണപതിഹോമവും ഭാരതത്തിലുടനീളമുള്ള വിവിധ ഗോത്രവിഭാഗങ്ങളെയും സാമുദായിക സംഘടനകളെയും ഉള്പ്പെടുത്തി വിശ്വശാന്തി പ്രാര്ത്ഥനകളും നടക്കും. നിര്ധനരായ അമ്പതിലധികം യുവതീയുവാക്കള്ക്കായി സമൂഹവിവാഹം നടത്തും. വസ്ത്രങ്ങളും ആഭരണങ്ങളും മറ്റുമടക്കമുള്ള എല്ലാ ചെലവുകളും മഠം വഹിക്കും. ആശ്രമം പുറത്തിറക്കുന്ന വിവിധ പുസ്തകങ്ങളുടെ പ്രകാശനവും ഉണ്ടാകും. മഠത്തിന് കീഴില് പ്രവര്ത്തിക്കുന്ന സ്വാശ്രയ സംഘങ്ങള്ക്കായുള്ള മൂലധന വിതരണോദ്ഘാടനവും ജന്മദിനാഘോഷങ്ങളോടനുബന്ധിച്ച് നടക്കും.
