തിരുവനന്തപുരം: നടി റിനി ആന്‍ ജോര്‍ജിനെ സാമൂഹ്യമാധ്യമങ്ങളില്‍ അധിക്ഷേപിച്ചെന്ന പരാതിയില്‍ കര്‍ശന നടപടിക്ക് നിര്‍ദേശം നല്‍കി ഡി.ജി.പി. ആരോപണ വിധേയര്‍ക്കെതിരെ കേസ് എടുക്കാനാണ് പൊലീസ് നീക്കം. നടിയുടെ പരാതിയില്‍ പറയുന്ന വ്യക്തികള്‍ക്കെതിരെ പ്രത്യേകമായിട്ടായിരിക്കും കേസ് എടുക്കുക.
രാഹുല്‍ ഈശ്വര്‍, ഷാജന്‍ സ്‌കറിയ, ക്രൈം നന്ദകുമാര്‍ ഉള്‍പ്പെടെ ഉളളവര്‍ക്ക് എതിരെയാണ് പരാതി. ജാമ്യമില്ലാ വകുപ്പ് അടക്കം ചുമത്താവുന്ന കുറ്റം പരാതിയില്‍ ഉണ്ടെന്ന് പൊലീസ് പറഞ്ഞു.കേസ് രജിസ്റ്റര്‍ ചെയ്യുന്നത് എവിടെ എന്നതില്‍ തീരുമാനമായില്ല.രാഹുല്‍ മാങ്കുട്ടത്തിലിനെതിരെ വെളിപ്പെടുത്തല്‍ നടത്തിയതിന് പിന്നാലെ ആയിരുന്നു റിനി ആന്‍ ജോര്‍ജിന് നേരെ സൈബര്‍ ആക്രമണം ശക്തമായത്.
യുവ എം എല്‍ എയ്‌ക്ക് എതിരായ ആരോപണങ്ങള്‍ക്ക് പിന്നാലെ തനിക്ക് നേരെ നടക്കുന്ന സൈബര്‍ ആക്രമണങ്ങള്‍ക്കെതിരെ, വിവിധ ഓണ്‍ലൈന്‍ ചാനലുകളുടെ ലിങ്കുകള്‍ അടക്കം മുഖ്യമന്ത്രിക്ക് റിനി ആന്‍ ജോര്‍ജ് പരാതി നല്‍കിയിരുന്നു. അപകീര്‍ത്തികരമായ പ്രചാരണം നടത്തി മോശക്കാരിയായി ചിത്രീകരിക്കാന്‍ ശ്രമിക്കുന്നു എന്നാണ് പരാതിയില്‍ പറയുന്നത്.
മുഖ്യമന്ത്രിക്കു പുറമേ എറണാകുളം റൂറല്‍ എസ്പി, മുനമ്പം ഡിവൈഎസ്പി എന്നിവര്‍ക്കും പരാതി നല്‍കി. പൊള്ളേണ്ടവര്‍ക്ക് പൊള്ളി എന്നും അതാണ് തനിക്ക് എതിരെ നടക്കുന്ന പെയ്ഡ് സൈബര്‍ ആക്രമണത്തിന് കാരണം എന്നും റിനി ആന്‍ ജോര്‍ജ് പറഞ്ഞു.
നേരിട്ട് ആക്രമണം നടത്തുന്നവരെ മാത്രം അല്ല പിന്നില്‍ പ്രവര്‍ത്തിക്കുന്നവരെയും കണ്ടെത്തണം. തന്നെ മാത്രം അല്ലാ തന്റെ പുരുഷ സുഹൃത്തുകളുടെ സ്വകാര്യതയെയും ഇത് ബാധിക്കുന്നുണ്ടെന്നും റിനി ആന്‍ ജോര്‍ജ് പറഞ്ഞു.
