ആലപ്പുഴ : നിര്ത്തിയിട്ട കാറില് നിന്ന് പത്തു കിലോ കഞ്ചാവും ഒന്നേമുക്കാല് ലക്ഷം രൂപയും പിടികൂടി. കാറിലുണ്ടായിരുന്ന നാലുപേരെ അറസ്റ്റു ചെയ്തു. ഇലിപ്പിക്കുളം നാമ്പുകളങ്ങര കുരിശുംമൂടിനു സമീപത്താണ് സംഭവം.
ഭരണിക്കാവ് കട്ടച്ചിറ യൂസഫ് മന്സില് യൂസഫ് (27), കൃഷ്ണപുരം കാപ്പില് കിഴക്ക് നല്ലേത്ത് പുത്തന്പുരയില് റിയാസ് ഖാന് (44), കട്ടച്ചിറ വി. വി. ഭവനത്തില് വിനീത് (29), കറ്റാനം ഇലിപ്പക്കുളം കല്ലേത്ത് മുഹമ്മദ് അമീന് (33) എന്നിവരാണ് അറസ്റ്റിലായത്. കാറും കസ്റ്റഡിയിലെടുത്തു. പ്ലാസ്റ്റിക് കവറുകളിലാക്കിയ കഞ്ചാവ് ചാക്കില്ക്കെട്ടി വാഹനത്തില് സൂക്ഷിച്ചിരിക്കുകയായിരുന്നെന്ന് പൊലീസ് പറഞ്ഞു. ഇതില് റിയാസ്ഖാന്റെ വീട്ടില്നിന്ന് കഴിഞ്ഞ ദിവസം 3.590 കിലോ കഞ്ചാവ് പിടികൂടിയിരുന്നു. പൊലീസിനെക്കണ്ട് കഞ്ചാവ് എടുത്തെറിഞ്ഞ ശേഷം ഓടി രക്ഷപ്പെട്ട ഇയാളെ കേന്ദ്രീകരിച്ച് നടത്തിയ അന്വേഷണത്തിലാണ് ഈ സംഘത്തെ പിടികൂടിയത്.
