തിരുവനന്തപുരം: സംസ്ഥാനത്തെ എയ്ഡഡ് സ്‌കൂളുകളില്‍ നിയമനത്തിനുമുമ്പ് പ്രവേശന പരീക്ഷ നടത്തുന്നത് സര്‍ക്കാര്‍ പരിഗണനയിലെന്ന് വിദ്യാഭ്യാസ മന്ത്രിയുടെ ഫെയ്‌സ്ബുക് പോസ്റ്റും പ്രസംഗത്തിന്റെ വാര്‍ത്താക്കുറിപ്പും. മിനിട്ടുകള്‍ക്കുള്ളില്‍ രണ്ടും മന്ത്രിയുടെ ഓഫീസ് പിന്‍വലിച്ചു.
വാര്‍ത്താക്കുറിപ്പ് പിന്‍വലിച്ചത് മന്ത്രിയുടെ പ്രസംഗത്തില്‍ ഉള്‍പ്പെടുത്താത്തതിനാലെന്ന് ഓഫീസിന്റെ വിശദീകരണം.
ഇന്നലെ സംസ്ഥാന അദ്ധ്യാപക അവാര്‍ഡ് വിതരണോദ്ഘാടനം നിര്‍വഹിച്ചത് വിദ്യാഭ്യാസമന്ത്രി വി. ശിവന്‍കുട്ടി. മന്ത്രിക്ക് എഴുതി നല്‍കിയ പ്രസംഗത്തില്‍ എയ്ഡഡ് സ്‌കൂളുകളില്‍ നിയമനത്തിന് മുമ്പ് പ്രവേശന പരീക്ഷ നടത്തുന്നത് സര്‍ക്കാര്‍ പരിഗണിക്കുന്നുവെന്ന് ഉണ്ടായിരുന്നു. എന്നാല്‍ പ്രസംഗം വായിക്കവേ അപകടം മനസിലാക്കിയ മന്ത്രി പ്രവേശന പരീക്ഷയുടെ ഭാഗം ഒഴിവാക്കി. പകരം അദ്ധ്യാപക നിയമനത്തിനുശേഷം മാനേജ്‌മെന്റുകള്‍ കൂടുതല്‍ ശ്രദ്ധിക്കണമെന്നു പറഞ്ഞ് തത്കാലം രക്ഷപ്പെട്ടു.
പക്ഷെ മന്ത്രിയുടെ ഓഫീസിന്റെ ടൈമിങ് തെറ്റി. മന്ത്രി പ്രവേശന പരീക്ഷ വിഷയം പ്രസംഗത്തില്‍ ഒഴിവാക്കിയത് മന്ത്രിയുടെ ഓഫീസ് ശ്രദ്ധിച്ചില്ല. ഉദ്ഘാടനം കഴിഞ്ഞ ഉടനെ ‘എയ്ഡഡ് സ്‌കൂളുകളില്‍ നിയമനം നടത്താനുള്ള അധികാരം മാനേജ്‌മെന്റുകള്‍ക്ക് ആണെങ്കിലും അപ്പോയ്‌മെന്റിന് മുമ്പ് ഒരു പ്രവേശന ടെസ്റ്റ് നടത്തുന്നത് സംബന്ധിച്ചുള്ള കാര്യം സര്‍ക്കാരിന്റെ പരിഗണനയിലാണ്’ എന്ന ഭാഗം ഉള്‍പ്പെടുത്തി വാര്‍ത്താക്കുറിപ്പ് മന്ത്രിയുടെ ഒഫിഷ്യല്‍ വാര്‍ത്താഗ്രൂപ്പില്‍ ഇട്ടു. അതിനൊപ്പം നേരത്തെ തയാറാക്കിയിരുന്ന പോസ്റ്റ് ഫെയ്‌സ്ബുക്കിലും നല്‍കി. ഒപ്പം ‘ഒരോ കുട്ടിക്കും ഗുണമേന്മാ വിദ്യാഭ്യാസം ഉറപ്പ് വരുത്താന്‍ ഈ നടപടിയിലൂടെ കഴിയുമെന്നാണ് പ്രതീക്ഷിക്കുന്നത്’ എന്നുകൂടി ചേര്‍ത്തു. സംഭവത്തില്‍ എയ്ഡഡ് സ്‌കൂള്‍ മാനേജ്‌മെന്റുകള്‍ പ്രതിഷേധം അറിയിച്ചതോടെ മന്ത്രി ഇടപെട്ട് പോസ്റ്റ് പിന്‍വലിപ്പിച്ചു. വാര്‍ത്താക്കുറിപ്പ് പൂര്‍ണമായി നീക്കിയശേഷം അദ്ധ്യാപക പരീക്ഷയുടെ കാര്യമാണ് ഉദ്ദേശിച്ചത് എന്നും തിരുത്തുകയായിരുന്നു.
