ന്യൂദല്‍ഹി:പ്രധാനമന്ത്രി മോദിയുടെ അമ്മയെ ബീഹാറിലെ രാഹുല്‍ ഗാന്ധിയുടെ പ്രസംഗവേദിയില്‍ കോണ്‍ഗ്രസ് പ്രവര്‍ത്തകര്‍ അപമാനിച്ച സംഭവത്തില്‍ പ്രതിഷേധിച്ച് ഉത്തര്‍പ്രദേശ് മന്ത്രിയായ ദിനേഷ് പ്രതാപ് സിങ്ങ്. റായ് ബറേലിയിലെത്തിയ രാഹുല്‍ ഗാന്ധിയെ മന്ത്രി ദിനേഷ് പ്രതാപ് സിങ്ങിന്റെ നേതൃത്വത്തില്‍ ബിജെപി പ്രവര്‍ത്തകര്‍ രാഹുല്‍ ഗോ ബാക് മുദ്രാവാക്യങ്ങളുമായി വഴി തടഞ്ഞു.
ബുധനാഴ്ചയാണ് രാഹുല്‍ ഗാന്ധി ലഖ്നോയില്‍ വിമാനമിറങ്ങിയത്. രാഹുല്‍ ഗാന്ധിയ്‌ക്ക് റായ് ബറേലി സന്ദര്‍ശിക്കണമായിരുന്നു. എന്നാല്‍ രാഹുല്‍ ഗാന്ധി കടന്നുപോകാന്‍ സാധ്യതയുള്ള ഹൈവേയിലാണ് മന്ത്രി ദിനേഷ് പ്രതാപ് സിങ്ങും ബിജെപി പ്രവര്‍ത്തകരും വഴി തടയാന്‍ കുത്തിയിരുന്നത്. രാഹുല്‍ ഗാന്ധി വഴിമാറിപ്പോവുകയായിരുന്നു.
ദേശത്തിന്റെ അമ്മയെ അധിക്ഷേപിച്ചതിന് മാപ്പില്ല, രാഹുല്‍ ഗോ ബാക്ക് എന്നീ മുദ്രാവാക്യങ്ങള്‍ എഴുതിയ പ്ലക്കാര്‍ഡുകളും പ്രവര്‍ത്തകര്‍ ഉയര്‍ത്തിയിരുന്നു. രാഹുല്‍ ഗാന്ധി രാജ്യത്തെ മുഴുവന്‍ അമ്മമാരോടും മാപ്പ് പറയുന്നതുവരെ പ്രതിഷേധം തുടരുമെന്നും ദിനേഷ് പ്രതാപ് സിങ്ങ് പറഞ്ഞു.
“രാഹുല്‍ ഗാന്ധിയ്‌ക്കും ഒരു അമ്മയുണ്ട്. മറ്റുള്ളവരുടെ അമ്മമാരെ അപമാനിക്കാനുള്ള അവകാശം പാര്‍ട്ടി പ്രവര്‍ത്തകര്‍ക്ക് രാഹുല്‍ ഗാന്ധി നല്‍കാന്‍ പാടില്ലായിരുന്നു. ഒരു അമ്മയ്‌ക്കെതിരെ അധിക്ഷേപവാക്കുകള്‍ പറഞ്ഞവരെ രാഹുല്‍ ഗാന്ധി വിമര്‍ശിക്കേണ്ടതായിരുന്നു. അവരെ പിന്തുണയ്‌ക്കില്ലെന്ന് രാഹുല്‍ ഗാന്ധി പരസ്യമായി പറയേണ്ടതായിരുന്നു. പകരം മൗനാനുവാദം നല്‍കി. അവരെ പാര്‍ട്ടിയില്‍ നിന്നും പുറത്താക്കണം. അവര്‍ ചെയ്ത തെറ്റില്‍ പശ്ചാത്തപിക്കണം.”- മന്ത്രി ദിനേഷ് പ്രതാപ് സിങ്ങ് പറഞ്ഞു.
