വാഷിങ്ടണ്: ഇന്ഡോ-പസഫിക് മേഖലയില് വര്ദ്ധിച്ചുവരുന്ന ചൈനീസ് സ്വാധീനം ഭാരതത്തിന്റെ പിന്തുണയില്ലാതെ നേരിടാനാകില്ലെന്ന് മുന് യുഎസ് ഉപദേഷ്ടാവ് മേരി കിസ്സല്. യുഎസ്-ഭാരത പങ്കാളിത്തത്തിലൂടെ മാത്രമേ ചൈനീസ് ഭീഷണികളെ നേരിടാന് സാധിക്കു എന്ന് അവര് പ്രതികരിച്ചു. സ്വകാര്യ മാധ്യമത്തിന് നല്കിയ അഭിമുഖത്തിലാണ് ഈ വെളിപ്പെടുത്തല്. മുന് യുഎസ് സ്റ്റേറ്റ് സെക്രട്ടറി മൈക് പോംപെയോയുടെ ഉപദേഷ്ടാവായിരുന്നു മേരി കിസ്സല്.
യുഎസ് ചൈനയെ വലിയ എതിരാളിയായി കാണുന്നുണ്ടെങ്കില് നമുക്ക് ഭാരതത്തെ ആവശ്യമുണ്ട്. ഏഷ്യ – പസഫിക്കില് യുഎസിന് ഒറ്റക്ക് ചൈനയെ എതിരിടാന് സാധിക്കില്ല.
ടിയാന്ജിനില് നടന്ന 25-ാമത് ഷാങ്ഹായ് കോ-ഓപ്പറേഷന് (എസ്സിഒ) ഉച്ചകോടിയില് പ്രധാനമന്ത്രി നരേന്ദ്രമോദിയും ചൈനീസ് പ്രസിഡന്റ് ഷി ജിന്പിങ്ങും റഷ്യന് പ്രസിഡന്റ് വ്ളാദിമീര് പുടിനുമായി ഉഭയകക്ഷി ചര്ച്ചകള് നടത്തിയിരുന്നു. ട്രംപ് ഭരണകൂടത്തിന് വെല്ലുവിളി ഉയര്ത്തുന്നതാണ് ഈ കൂടിക്കാഴ്ച.
ഭാരതവുമായുള്ള ബന്ധം യുഎസ് മെച്ചപ്പെടുത്തണം, അവര് കൂട്ടിച്ചേര്ത്തു.
റഷ്യയില് നിന്നുള്ള എണ്ണ ഇറക്കുമതി നിര്ത്തിവെക്കാത്തതിനെ തുടര്ന്ന് യുഎസ് ഭാരതത്തിനുമേലുള്ള താരിഫ് 50 ശതമാനമാക്കി ഉയര്ത്തി. ഇതോടെയാണ് ഭാരതവും യുഎസും തമ്മിലുള്ള നയതന്ത്ര ബന്ധത്തില് വിള്ളല് വീണത്.
