തിരുവനന്തപുരം: സിപിഎം ഇടപെടലിനെ തുടര്‍ന്ന് ശിശുക്ഷേമസമിതിയില്‍ കുട്ടികളെ ഉപദ്രവിച്ച കേസില്‍ പിരിച്ചുവിട്ട ഒന്‍പത് ആയമാരില്‍ ആറുപേരെ സര്‍ക്കാര്‍ വീണ്ടും നിയമിച്ചു.
തിരുവനന്തപുരം ശിശുക്ഷേമ സമിതിയില്‍ കിടക്കയില്‍ മൂത്രമൊഴിച്ചതിന് രണ്ടര വയസുകാരിയുടെ ജനനേന്ദ്രിയത്തില്‍ ആയമാര്‍ മുറിവേല്‍പിച്ച സംഭവം വലിയ വിവാദമായിരുന്നു. പ്രതിഷേധം ഉയര്‍ന്നതോടെ മൂന്ന് ആയമാര്‍ അറസ്റ്റിലായി. ആകെ ഒന്‍പത് പേരെയാണ് അന്ന് പിരിച്ചുവിട്ടത്. ഇതില്‍ ആറുപേര്‍ക്കാണ് ഇപ്പോള്‍ പുനര്‍നിയമനം നല്‍കിയിരിക്കുന്നത്. കഴിഞ്ഞ വര്‍ഷം ഡിസംബറിലായിരുന്നു വിവാദ സംഭവം. ശിശുക്ഷേമ സമിതിയില്‍ കുട്ടികളെ ആയമാര്‍ ഉപദ്രവിക്കുന്നത് പതിവാണെന്ന വ്യാപക വെളിപ്പെടുത്തലും അക്കാലത്തുണ്ടായിരുന്നു.
