തിരുവനന്തപുരം: ആഗോളതലത്തില്‍ സ്വര്‍ണ വില വര്‍ദ്ധിക്കുന്നതിന് അനുസൃതമായി കേരളത്തിലും
സ്വര്‍ണ വില കൂടുന്നു. പവന് 160 രൂപ വര്‍ധിച്ച് ചൊവ്വാഴ്ച സ്വര്‍ണ വില 77,800 രൂപയിലെത്തി. ഗ്രാമിന് 20 രൂപയുടെ വര്‍ധനവോടെ 9725 രൂപയാണ് വില.
തിങ്കളാഴ്ച ചരിത്രത്തിലാദ്യമായി 77,000 രൂപ കടന്ന സ്വര്‍ണ വിലയ്‌ക്ക് 78,000 രൂപയിലെത്താനുള്ള ദൂരം വെറും 200 രൂപ അകലെ.
രാജ്യാന്തര സ്വര്‍ണ വിലയിലെ കുതിപ്പാണ് കേരളത്തിലും പ്രതിഫലിക്കുന്നത്. സ്‌പോട്ട് ഗോള്‍ഡ് ഔണ്‍സിന് 3508.50 ഡോളര്‍ വരെ ഉയര്‍ന്നു. ഏപ്രില്‍ 22 ന് രേഖപ്പെടുത്തിയ 3500 ഡോളര്‍ എന്ന റെക്കോര്‍ഡ് പഴങ്കഥ. താഴോട്ടിറങ്ങി 3,493 ഡോളറിലാണ് ചൊവ്വാഴ്ച വ്യാപാരം.
യു.എസ് ഫെഡറല്‍ റിസര്‍വ് പലിശ നിരക്ക് കുറയ്‌ക്കുമെന്ന സൂചനയാണ് സ്വര്‍ണ വില ഉയരാന്‍ കാരണം. സെപ്തംബര്‍ 17 നുള്ള ഫെഡ് യോഗത്തില്‍ 25 അടിസ്ഥാന നിരക്കിന്റെ കുറവാണ് പലിശ നിരക്കില്‍ പ്രതീക്ഷിക്കുന്നത്. ഫെഡറല്‍ റിസര്‍വിനെതിരെ അമേരിക്കന്‍ പ്രസിഡന്റ് ഡോണാള്‍ഡ് ട്രംപിന്റെ നീക്കങ്ങളും അദ്ദേഹത്തിന്റെ തീരുവയും സ്വര്‍ണ വില കുതിക്കാന്‍ കാരണമാണ്.
ഒരു പവന് സ്വര്‍ണാഭരണം വാങ്ങാന്‍ 90,000 രൂപയ്‌ക്ക് അടുത്ത് ചെലവുണ്ട് ഇപ്പോള്‍. 10 ശതമാനം പണിക്കൂലിയില്‍ സ്വര്‍ണം വാങ്ങാന്‍ 88,190 രൂപയോളമാകും ചെലവ്. 77,800 രൂപയോടൊപ്പം 10 ശതമാനം പണിക്കൂലിയും 55 രൂപ ഹാള്‍മാര്‍ക്കിംഗ് ചാര്‍ജും മൂന്ന് ശതമാനം ജിഎസ്ടിയും ചേരുന്ന തുകയാണിത്. അഞ്ച് പവന് ആഭരണം വാങ്ങാന്‍ 4,40,737 രൂപയാണ് ഇപ്പോഴത്തെ വില പ്രകാരമുള്ള ചെലവ്.
