തിരുവനന്തപുരം: വയനാട് തുരങ്കപാതയുടെ നിര്‍മാണോദ്ഘാടനം ആഘോഷമാക്കുന്നവര്‍ മുണ്ടക്കൈ ദുരന്തം മറന്നോ എന്ന് മുന്‍ കേന്ദ്രമന്ത്രി വി. മുരളീധരന്‍. പാരിസ്ഥിതിക ആഘാതം ഉണ്ടാക്കുന്ന പദ്ധതി അപ്രായോഗികമാണ്. കേന്ദ്രം നല്കിയ മറുപടിയില്‍ 60 ഉപാധികള്‍ ഉണ്ട്. ലക്ഷങ്ങള്‍ പൊടിച്ചു പ്രചാരണം നടത്തുന്നവര്‍ അത് വായിച്ചുനോക്കിയോ? വി. മുരളീധരന്‍ ചോദിച്ചു.
എന്തെങ്കിലും കാണിച്ചു നാലുവോട്ട് നേടാന്‍ ആണ് പിണറായി ശ്രമിക്കുന്നത്. സമസ്തമേഖലയും പിണറായിയുടെ ഭരണകാലത്തു പിന്നോട്ട് പോയി. ആരോഗ്യ – വിദ്യാഭ്യാസ മേഖലകള്‍ നശിച്ചു. ആരോഗ്യമേഖല ലോകോത്തരമെന്നു പറയുന്ന മുഖ്യമന്ത്രി മെഡിക്കല്‍ കോളജില്‍ പോയി നോക്കണം.
സാധാരണക്കാര്‍ക്ക് പരിഗണനയും നീതിയും ഇതുപോലെ ലഭ്യമാകാതെ പോയ ഭരണം മുന്‍പില്ലെന്നും അദ്ദേഹം പറഞ്ഞു. കേന്ദ്രപദ്ധതികളുടെ ക്രെഡിറ്റ് എടുക്കാന്‍ മാത്രമാണ് പിണറായിക്ക് അറിയാവുന്നത്.
ഇവിടെ ഒരു അരിമണി പോലും പിണറായി നല്കുന്നത് അല്ല. എന്നാല്‍ മണിയോര്‍ഡര്‍ പോസ്റ്റുമാന്‍ സ്വന്തം പടമൊട്ടിച്ചു വിതരണം ചെയ്യുന്നപോലെ വീമ്പു പറയുന്നതാണ് അവസ്ഥ എന്നും അദ്ദേഹം പരിഹസിച്ചു. വിശ്വാസികളെ കബളിപ്പിക്കാനാണ് പുതിയ നീക്കം. ആഗോള അയ്യപ്പ ഭക്തസംഗമവേദിയില്‍ പിണറായി ശരണം വിളിക്കുമോ എന്നും വി. മുരളീധരന്‍ പ്രതികരിച്ചു. തിരുവനന്തപുരത്ത് ബിജെപിയുടെ വാര്‍ഡ് കണ്‍വെന്‍ഷനുകള്‍ ഉദ്ഘാടനം ചെയ്ത് സംസാരിക്കുകയായിരുന്നു വി. മുരളീധരന്‍.
