തൃശൂര്‍: ലുലു ഗ്രൂപ്പിന്റെ ഭൂമി തരം മാറ്റിയ ആര്‍ഡിഒ ഉത്തരവ് ഹൈക്കോടതി റദ്ദാക്കി. ഭൂമി തരം മാറ്റാനുള്ള ലുലു ഗ്രൂപ്പിന്റെ അപേക്ഷ വീണ്ടും പരിഗണിക്കാന്‍ കോടതി നിര്‍ദ്ദേശം നല്‍കി.
കൃഷി ഓഫീസറുടെ റിപ്പോര്‍ട്ടും സ്‌റ്റേറ്റ് റിമോട്ട് സെന്‍സിംഗ് ആന്‍ഡ് എന്‍വയണ്‍മെന്റ് സെന്റര്‍ – ഡയറക്ടറുടെ മേല്‍നോട്ടത്തിലുള്ള റിപ്പോര്‍ട്ടടക്കം പരിശോധിച്ച് വിഷയത്തില്‍ നാല് മാസത്തിനകം ആര്‍ഡിഒ തീരുമാനമെടുക്കണമെന്നാണ് കോടതി ഉത്തരവ്. ഈ സാഹചര്യത്തില്‍ ആര്‍ഡിഒ റിപ്പോര്‍ട്ട് പരിഗണനയ്‌ക്കായി വീണ്ടും തിരിച്ചയച്ചു.
നിയമാനുസരണമുളള നടപടിക്രമങ്ങള്‍ പാലിക്കാതെയാണ് ഭൂമിയെ ഡാറ്റാബാങ്കില്‍ നിന്ന് ഒഴിവാക്കിയതെന്ന് കോടതി കണ്ടെത്തി. കൃഷി ഓഫീസറുടെ റിപ്പോര്‍ട്ട് പരിഗണിച്ചിട്ട് വേണം ആര്‍ഡിഒ തരംമാറ്റത്തിന് അനുമതി നല്‍കേണ്ടത്. എന്നാല്‍ ഈ ഭൂമിയുടെ കാര്യത്തില്‍ അതുണ്ടായില്ലെന്ന് കോടതി ചൂണ്ടിക്കാട്ടി. സാറ്റലൈറ്റ് ദൃശ്യങ്ങളും ഗൂഗില്‍ എര്‍ത്ത് ഡേറ്റ, വില്ലേജ് ഓഫീസറുടെ മഹസര്‍ എന്നിവയില്‍ 2022ല്‍ വരെ ഭൂമി നെല്‍വയലാണെന്ന് തെളിയിക്കുന്നതായുള്ള രേഖകളും കോടതി പരിശോധിച്ചു.
ആര്‍ഡിഒ റിപ്പോര്‍ട്ട് തിരിച്ചയച്ച സാഹചര്യത്തില്‍ ലുലു ഹൈപ്പര്‍ മാര്‍ക്കറ്റ് നല്‍കിയ കണ്‍വേര്‍ഷന്‍ ഫീ താല്‍ക്കാലികമായി തിരികെ നല്‍കാനും കോടതി നിര്‍ദ്ദേശിച്ചു. തൃശൂര്‍ അയ്യന്തോളിലെ നിര്‍ദ്ദിഷ്ട പദ്ധതി പ്രദേശത്തെ ഭൂമി പാടശേഖര ഭൂമിയായി ഡേറ്റ ബാങ്കില്‍ തെറ്റായാണ് ഉള്‍പ്പെടുത്തിയതെന്ന വാദമുയര്‍ത്തിയാണ് ലുലു ഹൈപ്പര്‍ മാര്‍ക്കറ്റ് പ്രൈവറ്റ് ലിമിറ്റഡ് കോടതിയെ സമീപിച്ചത്. 2008ലെ നെല്‍വയല്‍ തണ്ണീര്‍ത്തട നിയമം വരും മുന്നേ തന്നെ കൃഷി ചെയ്യാനാകാത്ത വിധം ഭൂമിയുടെ സ്വഭാവം മാറിയിരുന്നുവെന്നും അതിനാല്‍ പുരയിടമായി രേഖപ്പെടുത്തണം എന്നുമാണ് ആവശ്യം.
