കൊച്ചി: രാജ്യത്തിന്റെ അഭിമാന കായികതാരവും രാജ്യസഭാംഗവുമായ പി ടി ഉഷയുടെ ഏക മകൻ ഡോ. വിഘ്നേഷ് ഉജ്ജ്വല്‍ വിവാഹിതനായി. കൊച്ചിയിൽ ലെ മെറിഡിയന്‍ ഹോട്ടലില്‍ വെച്ചാണ് വിവാഹം നടന്നത്. ഒട്ടേറെ പ്രമുഖര്‍ വിവാഹത്തില്‍ പങ്കെടുത്തു.
കൊച്ചി വൈറ്റില ചെല്ലിയന്തര ശ്രീരാം കൃഷ്ണയില്‍ അശോക് കുമാറിന്റെയും ഷിനിയുടെയും മകള്‍ കൃഷ്ണ ആണ് വധു. സ്പോര്‍ട്സ് മെഡിസിന്‍ പഠിച്ച ഡോ. വിഘ്നേഷ് ഉജ്ജ്വല്‍ പി.ടി. ഉഷ സ്ഥാപിച്ച സ്കൂള്‍ ഓഫ് അത് ലറ്റിക്സില്‍ ഡോക്ടറാണ്.
വധൂവരന്മാരെ ആശീര്‍വദിക്കാന്‍ പി.ടി. ഉഷയുടെ പ്രിയ സുഹൃത്ത് മേരി കോം മലയാള തനിമ നിറഞ്ഞ വേഷത്തിൽ അണിഞ്ഞൊരുങ്ങി വേദിയില്‍ എത്തിയത് കൗതുകകരമായി.
സദസ്സില്‍ ഇരുന്നിരുന്ന നടന്‍ ശ്രീനിവാസന്റെ അരികിലേക്ക് പി.ടി. ഉഷ, ഭര്‍ത്താവ് ശ്രീനിവാസനും മകന്‍ ഡോ. വിഘ്നേഷ് ഉജ്ജ്വലും വധു കൃഷ്ണയും ചെന്നതും കൗതുകമുണര്‍ത്തി. ശ്രീനിവാസന്റെ മുമ്പില്‍ തറയില്‍ മുട്ടുകുത്തിയിരുന്ന് നവവരനായ വിഘ്നേഷ് ഉജ്ജ്വല്‍ അനുഗ്രഹം വാങ്ങുന്ന വൈകാരിക നിമിഷത്തിനും ചടങ്ങ് സാക്ഷ്യം വഹിച്ചു. വധുവും ശ്രീനിവാസന്റെ കാല്‍ തൊട്ട് വന്ദിച്ചു.
