കൊച്ചി: കവി ചങ്ങമ്പുഴയുടെ ജീവിതത്തെ ഇനി ശില്‍പരൂപത്തില്‍ കാണാം. കേരളത്തിലെ മറ്റേതൊരു കവിക്കും ലഭിക്കാത്ത അംഗീകാരമായി ചങ്ങമ്പുഴ കൃഷ്ണപിള്ളയുടെ ജീവിതത്തെ ശില്‍പരൂപത്തില്‍ കാണികള്‍ക്കു മുന്‍പില്‍ അവതരിപ്പിച്ചിരിക്കുകയാണ് എറണാകുളം ചങ്ങമ്പുഴപ്പാര്‍ക്കില്‍. ചങ്ങമ്പുഴപ്പാര്‍ക്കിലെ ഓഡിറ്റോറിയത്തിനു ചുറ്റുമാണ് ഇത്തരത്തില്‍ ശില്‍പങ്ങള്‍ ആലേഖനം ചെയ്തിരിക്കുന്നത്. നാടകനടനും ചിത്രകാരനുമായ പ്രമോദ് ഗോപാലകൃഷ്ണനാണ് ഈ ശില്‍പങ്ങള്‍ നിര്‍മിച്ചിരിക്കുന്നത്.
ചങ്ങമ്പുഴ കവിതകള്‍ ലോകപ്രശസ്തമാണെങ്കിലും അദ്ദേഹത്തിന്റെ ജീവിതത്തിലെ പല നിമിഷങ്ങളും കൂട്ടിച്ചേര്‍ത്തുകൊണ്ടണ്് ഈ ദൃശ്യാവിഷ്‌ക്കാരം നിര്‍മ്മിച്ചിരിക്കുന്നത്. ജനനം, വിദ്യാഭ്യാസം, രചനകളുടെ ആരംഭം, രമണന്‍ എന്ന വിഖ്യാത കൃതിയിലേക്കുള്ള കടന്നു വരവ്. ജീവിതത്തെക്കുറിച്ച് കൂടുതല്‍ പഠിക്കാന്‍ ചിത്രകാരന്‍ പ്രമോദിനെ സഹായിച്ചതും കവിയുടെ ജീവിതാനുഭവങ്ങളും പറഞ്ഞു തന്നത് കവിയുടെ മരുമകന്‍ ഹരികുമാര്‍ ചങ്ങമ്പുഴയാണെന്ന് പ്രമോദ് പറയുന്നു. കവിയുടെ ജനനം മുതലുള്ള ജീവിതാനുഭവങ്ങള്‍ 10 പാനലുകളായാണ് ചിത്രീകരിച്ചിരിക്കുന്നത്. ചങ്ങമ്പുഴയുടെ സുഹൃദ്‌വലയത്തിലെ പ്രധാന കണ്ണികളായ ഉറൂബ്, ഇടപ്പള്ളി രാഘവന്‍പിള്ള, എസ്.കെ. പൊറ്റക്കാട് എന്നിരെയും പ്രധാന കഥാപാത്രങ്ങളാക്കിയിരിക്കുകയാണ്.
നമ്മള്‍ ചുറ്റും കാണുന്ന സങ്കല്‍പ ലോകമല്ല ഈ ഉലകം എന്നു പഠിപ്പിച്ച ചങ്ങമ്പുഴ കൃഷ്ണപിള്ളയ്‌ക്ക് നല്‍കാവുന്ന ആദരങ്ങളില്‍ ഏറ്റവും മികച്ചതാണ് ഈ ശില്‍പങ്ങളെന്ന് ചിത്രകാരന്‍ അഭിപ്രായപ്പെടുന്നു. തൃപ്പൂണിത്തുറ ആര്‍എല്‍വിയില്‍ ചിത്രകല ആഭ്യസിച്ച് ഒപ്പം നാടകവും ഒരുമിച്ച് ജീവിതത്തിന്റെ പ്രധാനഭാഗമാക്കി കൊണ്ടു നടക്കുന്ന പ്രമോദ് ബാലകൃഷ്ണന്‍ ഇത്തരത്തില്‍ ഒരു സംരംഭം ഏറ്റെടുത്തതില്‍ അതീവ സന്തോഷവാനാണെന്നും അഭിപ്രായപ്പെട്ടു.
ജന്മഭൂമി ഓണ്‍ലൈന്‍