തൃശൂര്: കെപിസിസി സെക്രട്ടറിയും യൂത്ത് കോണ്ഗ്രസ് നേതാവും ഉള്പ്പെട്ട ഏഴുകോടി രൂപയുടെ ഹീവാന് ഫിനാന്സ് നിക്ഷേപത്തട്ടിപ്പ് കേസില് കമ്പനി ആരംഭിച്ച കാലം മുതല് ഡയറക്ടറും മുഖ്യനടത്തിപ്പുകാരിയുമായിരുന്ന ഗ്രീഷ്മ ഒളിവില് കഴിഞ്ഞത് ഒരു വര്ഷത്തിലേറെക്കാലം. മുഖ്യപ്രതിയും ഭര്ത്താവുമായ പുതൂര്ക്കര സ്വദേശി ബിജു മണികണ്ഠനും മറ്റു പ്രതികളും അറസ്റ്റിലായിട്ടും ഗ്രീഷ്മയെ പിടിക്കാന് കഴിഞ്ഞിരുന്നില്ല. കഴിഞ്ഞ ദിവസമാണ് ഇവര് ആലുവയില് നിന്ന് ക്രൈംബ്രാഞ്ചിന്റെ കസ്റ്റഡിയിലാവുന്നത്. കെപിസിസി സെക്രട്ടറിയായിരുന്ന സി എസ് ശ്രീനിവാസന്, യൂത്ത് കോണ്ഗ്രസ് നേതാവ് സി എം അനില്കുമാര്, പ്രവാസി വ്യവസായി സുന്ദര് സി മേനോന് തുടങ്ങിയവരാണ് മറ്റു പ്രതികള്. ചിട്ടി, നിക്ഷേപം എന്നീ പേരുകളിലാണ് നിരവധി പേരില് നിന്ന് പണം തട്ടിയെടുത്തതിന് 67 കേസുകളാണ് ക്രൈംബ്രാഞ്ചിന്റെ അന്വേഷണത്തിലുള്ളത്. ബിജു മണികണ്ഠനും സുന്ദര് മേനോനും സി. എസ്. ശ്രീനിവാസനും നേരത്തെ അറസ്റ്റിലായിരുന്നു.
