കാസര്‍കോട് : കുണ്ടംകുഴി സ്‌കൂളില്‍ പത്താം ക്ലാസ് വിദ്യാര്‍ത്ഥിയുടെ കര്‍ണ്ണപടം അടിച്ച് പൊട്ടിച്ച സംഭവത്തില്‍ സ്‌കൂള്‍ ഹെഡ്മാസ്റ്ററെ സ്ഥലം മാറ്റിയതുകൊണ്ടുമാത്രം പ്രശ്‌നപരിഹാരമാകില്ലെന്ന് കുട്ടിയുടെ കുടുംബം. നിയമ നടപടികളുമായി മുന്നോട്ടുപോകുമെന്ന് അവര്‍ അറിയിച്ചു. വീഴ്ച ഉണ്ടായതായി അന്വേഷണത്തില്‍ കണ്ടെത്തിയതിനെ തുടര്‍ന്ന് മഞ്ചേശ്വരം കടമ്പാര്‍ ജിഎച്ച്എസ്എസിലേക്കാണ് ഹെഡ്മാസ്റ്ററെ സ്ഥലം മാറ്റിയത്. കാസര്‍കോട് വിദ്യാഭ്യാസ ഉപഡയറക്ടറാണ് അന്വേഷണം നടത്തിയത്.
അസംബ്ലിയില്‍ നില്‍ക്കുമ്പോള്‍ ചരല്‍ക്കല്ല് കാല് കൊണ്ട് നീക്കി എന്ന കാരണത്താല്‍ ഹെഡ്മാസ്റ്റര്‍ അസംബ്ലി നടക്കുന്നതിനിടെ കുട്ടിയെ മുന്നിലേക്ക് വിളിച്ച് വിദ്യാര്‍ത്ഥികളുടെയെല്ലാം മുന്നില്‍ വച്ച് കോളറില്‍ പിടിച്ചുവെന്നും ചെവിചേര്‍ത്ത് മുഖത്ത് അടിച്ചുവെന്നുമാണ് പരാതി . സംഭവത്തില്‍ ബാലാവകാശ കമ്മീഷന്‍ സ്വമേധയാ കേസെടുത്തിട്ടുണ്ട്.
