പൂവാര്: കരുംകുളം പഞ്ചായത്തിന്റെ പ്രധാന റോഡുകളിലൊന്നായ പരണിയം കാവുനട ജനകീയ റോഡ് തകര്ന്നിട്ട് വര്ഷങ്ങള്. ഇലക്ട്രിസിറ്റി ബോര്ഡ് കേബിള് ഇടുന്നതിനും വാട്ടര് അതോറിറ്റി പൈപ്പുകള് സ്ഥാപിക്കുന്നതിനും വേണ്ടി റോഡിനെ കുത്തിപ്പൊളിക്കുകയായിരുന്നുവെന്ന് നാട്ടുകാര് പറയുന്നു.
ഒന്നര കിലോമീറ്റര് ദൂരം വരുന്ന റോഡ് സഞ്ചാരയോഗ്യമാക്കണമെന്ന നാട്ടുകാരുടെ ആവശ്യത്തിന് പിന്നാലെ എംഎല്എയുടെ ഫണ്ടില് നിന്നും പണം അനുവദിച്ചു. തുടര്ന്ന് പണിക്കായി റോഡിനെ പൂര്ണ്ണമായും കുത്തിപ്പൊളിച്ച നിലയിലാക്കിയിട്ട് ആഴ്ചകള് കഴിഞ്ഞു. ഇതേത്തുടര്ന്ന് കാല്നട യാത്ര പോലും ഇതുവഴി ദുസഹമാണ്.
ടാറിങിന്റെ ഭാഗമായി മൂന്നു മാസം മുമ്പ് റോഡിന്റെ വളവില് വെറും 50 മീറ്റര് ദൂരം മാത്രം അശാസ്ത്രീയമായി ഓട നിര്മ്മിച്ചശേഷം സ്ലാബ് ഇട്ടത് അപകടങ്ങള്ക്ക് കാരണമായതായി പ്രദേശവാസികള് പറയുന്നു. പരണിയത്ത് നിന്നും തുടങ്ങുന്ന റോഡിന്റെ അര കിലോമീറ്റര് ദൂരം വിട്ട ശേഷമാണ് പുതുതായി ഓട നിര്മ്മിച്ചത്. ഓടയില്ലാത്ത ഭാഗത്തുണ്ടാകുന്ന വെള്ളക്കെട്ടിന് പരിഹാരം എന്തെന്ന് ചോദ്യത്തിനും അധികൃതര്ക്കും മറുപടിയില്ല. ഒരാഴ്ച്ച മുമ്പ് റോഡിന്റ പകുതിയില് ചാലുവെട്ടി മണ്ണിട്ടതോടെ ഇതുവഴിയുള്ള വാഹനയാത്രയും കാല്നടയാത്രയും ദുസ്സഹമായിരിക്കുകയാണ്.
അതിനിടെ, റോഡിന്റെ നവീകരണത്തിന് 47 ലക്ഷം രൂപ അനുവദിച്ച എംഎല്എയ്ക്കും കരുംകുളം പഞ്ചായത്ത് പ്രസിഡന്റിനും അഭിനന്ദനം അറിയിച്ച് ഫ്ളക്സുകള് ഉയര്ന്നിട്ടുണ്ട്. എന്നാല് റോഡ് നവീകരണം എന്ന് പൂര്ത്തിയാക്കാന് സാധിക്കുമെന്ന് നാട്ടുകാര് ജനപ്രതിനിധികളോട് ചോദിച്ചാല് ഉത്തരമില്ല. നിരവധി യാത്രക്കാര് സഞ്ചരിക്കുന്ന റോഡിന്റെ ശോചനീയാവസ്ഥയ്ക്ക് പരിഹാരം കാണണമെന്നാണ് നാട്ടുകാരുടെ ആവശ്യം.
