എറണാകുളം: എസ്എന്‍ഡിപി യോഗത്തിന്റെ ശ്രീനാരായണ ഗുരുദേവ ജയന്തി ആഘോഷ പരിപാടിയുടെ ഉദ്ഘാടന പരിപാടിയിലേക്ക് ക്ഷണിച്ചിട്ടുണ്ടെന്നും അതില്‍ പങ്കെടുക്കുമെന്നും പ്രതിപക്ഷ നേതാവ് വി ഡി സതീശന്‍. എറണാകുളത്ത് അടുത്തമാസം ഏഴിന് നടക്കുന്ന പരിപാടിയില്‍ ഉദ്ഘാടകനായാണ് വിഡി സതീശനെ ക്ഷണിച്ചിരിക്കുന്നത്.എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനുമായി തനിക്ക് ഒരു വഴക്കുമില്ലെന്നും വി ഡി സതീശന്‍ പ്രതികരിച്ചു.
എറണാകുളത്ത് രണ്ട് താലൂക്ക് യൂണിയനുകള്‍ തന്നെ ക്ഷണിച്ചിട്ടുണ്ട്. തീര്‍ച്ചയായും പങ്കെടുക്കും- വിഡി സതീശന്‍ പറഞ്ഞു.
വെള്ളപ്പള്ളി നടേശന്‍ അനുവദിക്കാതെ തന്നെ അവര്‍ വിളിക്കുമെന്ന് തോന്നുന്നില്ല.തന്നെ വിളിച്ചത് ഇഷ്ടമില്ലായിരുന്നെങ്കില്‍ ക്ഷണം പിന്‍വലിക്കാന്‍ അവരെ വിളിച്ച് പറയുമായിരുന്നു. വെളളാപ്പളളി അങ്ങനെ പറയുന്ന ആളാണെന്ന് തോന്നുന്നില്ലെന്നും വിഡി സതീശന്‍ പറഞ്ഞു. അദേഹം പറഞ്ഞ കാര്യത്തിലെ അഭിപ്രായ വ്യത്യാസം താന്‍ പറഞ്ഞിരുന്നു. അദേഹം വെല്ലുവിളിച്ചു, അത് സ്വീകരിച്ചു.
നേരത്തെ വിഡി സതീശന്റെ മണ്ഡലമായ പറവൂരിലെത്തി വെള്ളാപ്പള്ളി നടേശന്‍ അദ്ദേഹത്തെ വെല്ലുവിളിച്ചിരുന്നു.സതീശന്‍ ഈഴവ വിരോധിയാണെന്നും വരുന്ന നിയമസഭാ തിരഞ്ഞെടുപ്പില്‍ യുഡിഎഫിന് നൂറ് സീറ്റ് കിട്ടിയാല്‍ താന്‍ സ്ഥാനം ഒഴിയുമെന്നും ഇല്ലെങ്കില്‍ സതീശന്‍ രാഷ്‌ട്രീയവനവാസത്തിന് പോകുമോ എന്നായിരുന്നു വെളളാപ്പളളി ചോദിച്ചത്. ഈ വെല്ലുവിളി വിഡി സതീശന്‍ സ്വീകരിച്ചിരുന്നു.
