ന്യൂദല്‍ഹി: ഇന്ത്യയ്ക്കെതിരെ ആണവാക്രമണഭീഷണി ഉയര്‍ത്തിയ പാകിസ്ഥാന് താക്കീത് നല്‍കി ഇന്ത്യ. ഇന്ത്യയ്‌ക്കെതിരായ ഇത്തരം ഭീഷണികള്‍ നിയന്ത്രിച്ചില്ലെങ്കില്‍ വേദനാജനകമായ പ്രത്യാഘാതം അനുഭവിക്കേണ്ടി വരുമെന്നും ഇന്ത്യയുടെ വിദേശകാര്യവക്താവ് രണ്‍ധീര്‍ ജയ് സ്വാള്‍ പറഞ്ഞു.
“ഇന്ത്യയ്ക്കെതിരെ പാകിസ്ഥാന് നേതാക്കള്‍ വെറുപ്പും യുദ്ധാഹ്വാനവും ഉയര്‍ത്തിയതായുള്ള റിപ്പോര്‍ട്ടുകള്‍ കണ്ടു. സ്വന്തം പരാജയങ്ങള്‍ മറയ്‌ക്കാന്‍ വീണ്ടും വീണ്ടും ഇന്ത്യയ്ക്കെതിരെ ഭീഷണിയും ഉയര്‍ത്തുന്നത് പാകിസ്ഥാന് നേതൃത്വത്തിന്റെ സ്ഥിരം രീതിയാണ്.ഇത്തരം ഇന്ത്യാവിരുദ്ധ ഭീഷണികള്‍ നിയന്ത്രിക്കുന്നതാണ് പാകിസ്ഥാന് നല്ലത്. എന്തെങ്കിലും സാഹസത്തിന് ഒരുമ്പെട്ടാല്‍ വേദനാജനകമായ തിരിച്ചടി നേരിടേണ്ടതായിവരും” – രണ്‍ധീര്‍ ജയ്സ്വാള്‍ പറഞ്ഞു.
ഇന്ത്യയ്ക്കെതിരെ വേണ്ടിവന്നാല്‍ ആണവായുധങ്ങള്‍ പ്രയോഗിക്കുമെന്നും പാകിസ്ഥാന് നിലം പൊത്തുകയാണെങ്കില്‍ ലോകത്തിന്റെ പാതിയും ഞങ്ങളോടൊപ്പം വീഴുമെന്നാണ് പാകിസ്ഥാന്റെ ഫീല്‍ഡ് മാര്‍ഷല്‍ അസിം മുനീര്‍ അമേരിക്കാസന്ദര്‍ശനവേളയില്‍ ഇന്ത്യയെ ഭീഷണിപ്പെടുത്തിയിരുന്നു.
സിന്ധുനദീജലം പാകിസ്ഥാനിലേക്കൊഴുകുന്നത് തടയാന്‍ അണക്കെട്ട് നിര്‍മ്മിച്ചാല്‍ അതിനെ പത്ത് മിസൈലുകള്‍ അയച്ച് തകര്‍ക്കുമെന്നും അസിം മുനീര്‍ ഇന്ത്യയ്ക്കെതിരെ ഭീഷണി മുഴക്കിയിരുന്നു.
