കണ്ണൂര്: ഒരാഴ്ച മുമ്പ് കനത്ത കാറ്റിലും മഴയിലും വീട് തകര്ന്നുവീണപ്പോള് പറക്കമുറ്റാത്ത നാല് ചെറുമക്കളെയും നെഞ്ചോട് ചേര്ത്ത് വിതുമ്പി നിന്ന ജ്യോതി എന്ന മുത്തശ്ശി ഇന്ന് മുതല് ശ്രീരാഘവപുരം സഭായോഗത്തിന്റെ സ്നേഹത്തണലില്. പയ്യന്നൂര് തായിനേരിയിലെ വാടകക്കെട്ടിടത്തില് താമസിച്ച് ആക്രി പെറുക്കി വിറ്റും കഠിനാദ്ധ്വാനം ചെയ്തും ജ്യോതിയും മകള് ഭുവനേശ്വരിയും മക്കള്ക്ക് നല്ല വിദ്യാഭ്യാസം നല്കാനും ജീവിതസാഹചര്യമൊരുക്കാനും ഉള്ള പരിശ്രമത്തിലായിരുന്നു. അപ്പോഴാണ് ഭുവനേശ്വരിക്ക് വിദേശത്ത് മികച്ച ജോലി വാഗ്ദാനവുമായി ഒരു ഏജന്റ് ഇവരെ സമീപിച്ചത്. ജോലി മോഹവുമായി കുവൈത്തിലെത്തിയ ഭുവനേശ്വരിക്ക് നേരിടേണ്ടി വന്നത് കൊടിയ പീഡനമായിരുന്നു.
അതിനിടയിലാണ് ജ്യോതിയും ചെറുമക്കളും താമസിക്കുന്ന വാടക വീട് കനത്ത മഴയിലും കാറ്റിലും തകര്ന്നത്. ഒരു രാത്രി മുഴുവന് കനത്ത മഴയില് മേല്ക്കൂരയില്ലാത്ത വീട്ടില് കൊച്ചുമക്കളെയും ചേര്ത്തുപിടിച്ച് കഴിഞ്ഞ മുത്തശ്ശിയുടെ കദനകഥ മാധ്യമങ്ങളിലൂടെ അറിഞ്ഞ ചെറുതാഴം ശ്രീരാഘവപുരം സഭായോഗത്തിന്റെ സോഷ്യല് വെല്ഫെയര് ഡിപ്പാര്ട്ടുമെന്റ് പ്രവര്ത്തകര് ഇവരുടെ സംരക്ഷണം ഏറ്റെടുക്കുകയായിരുന്നു. വിദേശത്ത് ദുരിതമനുഭവിക്കുന്ന ഭുവനേശ്വരിയെ തിരിച്ചെത്തിക്കാനുള്ള ശ്രമങ്ങളും സഭായോഗം നടത്തി. ആഗോള തലത്തില് സേവാ പ്രവര്ത്തനം നടത്തുന്ന രക്ഷണം ഗ്രൂപ്പിന്റെ പ്രവര്ത്തകരായ ഷിബു പരപ്പ, രാഘവന് ആലംപാറ, അനുപ് പാലക്കാട്, ഹരീഷ് ബാബു കുന്നംകുളം തുടങ്ങിയവരുടെ ഇടപെടലിലുടെയും പ്രധാനമന്ത്രിയുടെ ഓഫീസിന്റെ സഹായത്തോടെയും കുവൈത്തിലെ ലേബര് ക്യാമ്പിലെത്തുകയും ഭൂവനേശ്വരിയെ രണ്ട് ദിവസം കൊണ്ട് നാട്ടിലെത്തിക്കുകയും ചെയ്തു.
രാവിലെ 4 മണിക്ക് കൊച്ചി വിമാനത്താവളത്തിലെത്തിയ ഭൂവനേശ്വരിയെ സഭായോഗം എറണാകുളം ജില്ലാ സമിതി ഭാരവാഹികളായ ശ്രീനിവാസന് നമ്പൂതിരി, ചന്ദ്രശേഖര്, ഉഷ അന്തര്ജനം എന്നിവര് ചേര്ന്ന് സ്വീകരിച്ചു. കണ്ണൂരിലെത്തിയ ദുവനേശ്വരിയെ സഭായോഗം പ്രസിഡന്റ് ശ്രീകാന്ത് കാര ഭട്ടതിരി, ഇടമന ശ്യാമള അന്തര്ജനം, വരക്കീല് സുബ്രഹ്മണ്യന് നമ്പൂതിരി, ശങ്കരന് കൈതപ്രം എന്നിവര് സ്വീകരിച്ചു പയ്യന്നൂരിലെത്തിച്ചു.
ഇന്ന് പയ്യന്നൂരില് താമസിക്കുന്ന കുടുംബം നാളെ രാവിലെ 10 മണിക്ക് കരിവെള്ളൂരില് സഭായോഗം തയ്യാറാക്കിയ വീട്ടില് താമസമാരംഭിക്കും.
