മലപ്പുറം:ആരോഗ്യ മന്ത്രിയും മഞ്ചേരി നഗരസഭാ അധ്യക്ഷയും തമ്മില് വേദിയില് വച്ച് തര്ക്കം. മഞ്ചേരി ജനറല് ആശുപത്രിയെ ചൊല്ലിയായിരുന്നു രൂക്ഷമായ വാക്പാര്.
മറ്റ് യുഡിഎഫ്, എല്ഡിഎഫ് നേതാക്കള് കൂടി വിഷയം ഏറ്റുപിടിച്ചതോടെ തര്ക്കം നീണ്ടു. യുഎ ലത്തീഫ് എംഎല്എയാണ് ജനറല് ആശുപത്രി വിഷയം വേദിയില് പറഞ്ഞത്.ഇതോടെ ഉദ്ഘാടനം കഴിഞ്ഞു മടങ്ങിയ മന്ത്രി വീണ ജോര്ജ് വീണ്ടും മൈക്കിന് മുന്നിലെത്തി എംഎല്എക്ക് മറുപടി നല്കി. 2016 ല് തന്നെ മഞ്ചേരി ജനറല് ആശുപത്രി നഗരസഭയ്ക്ക് കൈമാറിയ ഉത്തരവുണ്ടെന്ന് മന്ത്രി പറഞ്ഞു. ഉത്തരവിന്റെ പകര്പ്പും മന്ത്രി ഉയര്ത്തി കാട്ടി.
ഇതോടെ നഗരസഭ അധ്യക്ഷ വിഎം സുബൈദ മന്ത്രിക്ക് അരികില് എത്തി മറുപടി നല്കി. മന്ത്രി പറഞ്ഞത് സത്യമല്ലെന്ന് സുബൈദ വിളിച്ചുപറഞ്ഞു. ഇതിനിടയില് മറ്റു യുഡിഎപ്, എല്ഡിഎഫ് നേതാക്കളും വേദിയിലെത്തി ചേരിതിരിഞ്ഞു മറുപടി നല്കിയ ശേഷമാണ് തര്ക്കം തീര്ന്നത്.
അതിനിടെ, മലപ്പുറം കുറ്റിപ്പുറം താലൂക്ക് ആശുപത്രിയില് വിവിധ പദ്ധതികള് മന്ത്രി ഉദ്ഘാടനം ചെയ്യുന്നതിനിടെ യൂത്ത് കോണ്ഗ്രസ് പ്രവര്ത്തകര് പ്രതിഷേധിച്ചു. പിന്നാലെ യൂത്ത് കോണ്ഗ്രസ് പ്രവര്ത്തകരെ ഡിവൈഎഫ്ഐ പ്രവര്ത്തകര് മര്ദിച്ചു. ഡോ. ഹാരിസിന് പിന്തുണ അറിയിച്ചാണ് യൂത്ത് കോണ്ഗ്രസ് പ്രവര്ത്തകര് പ്ലക്കാര്ഡുകള് ഉയര്ത്തിയത്.
